មេដឹកនាំក្រុមឧទ្ទាមហ៊ូទីនៅប្រទេសយេម៉ែនបានព្រមានថា វត្តមានណាមួយរបស់អ៊ីស្រាអែលនៅក្នុងដែនដី Somaliland នឹងត្រូវបានចាត់ទុកថាជា «គោលដៅយោធា» នៅក្នុងការថ្កោលទោសចុងក្រោយចំពោះចំណាត់ការរបស់អ៊ីស្រាអែលក្នុងការទទួលស្គាល់តំបន់បំបែកខ្លួនមួយនេះ។

យោងតាមសេចក្តីថ្លែងការណ៍មួយដែលចេញផ្សាយដោយប្រព័ន្ធផ្សព្វផ្សាយរបស់ក្រុមឧទ្ទាមតាមអ៊ីនធឺណិត មេបញ្ជាការក្រុម លោក Abdel-Malik al-Houthi និយាយថា «យើងចាត់ទុកវត្តមានណាមួយរបស់អ៊ីស្រាអែលនៅក្នុងដែនដី Somaliland ជាគោលដៅយោធាសម្រាប់កងកម្លាំងប្រដាប់អាវុធរបស់យើង ព្រោះវាបង្កើតជាការឈ្លានពានលើប្រទេសសូម៉ាលី និងប្រទេសយេម៉ែន និងជាការគំរាមកំហែងដល់សន្តិសុខតំបន់» ។

អ៊ីស្រាអែល បានប្រកាសកាលពីថ្ងៃសុក្រសប្តាហ៍មុនថា ខ្លួនបានទទួលស្គាល់ជាផ្លូវការនូវដែនដី Somaliland ជាលើកដំបូងសម្រាប់សាធារណរដ្ឋប្រកាសដោយខ្លួនឯង ដែលកាលពីក្នុងឆ្នាំ១៩៩១ បានប្រកាសថាតំបន់នេះបានបំបែកជាឯកតោភាគីចេញពីប្រទេសសូម៉ាលី។ មេដឹកនាំក្រុមហ៊ូទី បានព្រមានថា ចំណាត់ការនេះមានផលវិបាកធ្ងន់ធ្ងរ ដោយនិយាយថា ការទទួលស្គាល់គឺជា «ជំហរអរិភាពដែលផ្តោតលើប្រទេសសូម៉ាលី និងតំបន់ជុំវិញអាហ្វ្រិក ព្រមទាំងប្រទេសយេម៉ែន សមុទ្រក្រហម និងប្រទេសនានានៅតាមបណ្តោយឆ្នេរសមុទ្រក្រហម»។ ដែនដី Somaliland អស់រយៈពេលជាច្រើនទសវត្សរ៍មកហើយ បានជំរុញឱ្យមានការទទួលស្គាល់ពីអន្តរជាតិ ដែលមានទីតាំងយុទ្ធសាស្ត្រមួយនៅលើឈូងសមុទ្រ Aden និងមានក្រដាស់ប្រាក់ លិខិតឆ្លងដែន និងកងទ័ពផ្ទាល់ខ្លួន។ អ្នកវិភាគក្នុងតំបន់និយាយថា ការផ្សះផ្សាជាមួយដែនដី Somaliland នឹងផ្តល់ឱ្យអ៊ីស្រាអែលនូវដំណើរការចូលទៅកាន់សមុទ្រក្រហមកាន់តែប្រសើរ ដែលអាចឱ្យប្រទេសនេះវាយប្រហារក្រុមឧទ្ទាមហ៊ូទីនៅក្នុងប្រទេសយេម៉ែន។