លោកប្រធានាធិបតីអាមេរិក Donald Trump ត្រូវគេរំពឹងថានឹងជំរុញសម្រាប់វឌ្ឍភាពនៃបទឈប់បាញ់ដែលបានជាប់គាំងក្នុងដែនដីហ្កាហ្សានៅពេលលោកនឹងជួបលោកនាយករដ្ឋមន្ត្រីអ៊ីស្រាអែល Benjamin Netanyahu នៅថ្ងៃចន្ទនេះ ក្នុងសហរដ្ឋអាមេរិក សម្រាប់ការពិភាក្សានានាដែលនឹងរួមបញ្ចូលទាំងក្ដីបារម្ភរបស់អ៊ីស្រាអែលជុំវិញបញ្ហាក្រុមហេសបូឡា នៅលីបង់ និងអ៊ីរ៉ង់។

លោក Netanyahu បាននិយាយនៅខែនេះថាលោក Trump បានអញ្ជើញរូបលោកសម្រាប់កិច្ចពិភាក្សា ខណៈទីក្រុងវ៉ាស៊ីនតោន ជំរុញបង្កើតរដ្ឋាភិបាលបណ្ដោះអាសន្ន និងកងកម្លាំងសន្តិសុខអន្តរជាតិ សម្រាប់ដែនដីប៉ាឡេស្ទីនដែលរងការឡោមព័ទ្ធមួយនេះ ។

លោក Trump បាននិយាយថា លោកអាចជួបមេដឹកនាំអ៊ីស្រាអែលឆាប់ៗ ប៉ុន្តែសេតវិមាន ពុំបានបញ្ជាក់ព័ត៌មានលម្អិតទេ ។ សេតវិមាន ពុំបានឆ្លើយតបទៅនឹងសំណើសុំការអត្ថាធិប្បាយអំពីកិច្ចប្រជុំនោះឡើយ។

លោក Netanyahu ដែលត្រូវគេរំពឹងថានឹងធ្វើដំណើរទៅកាន់រមណីយដ្ឋានឆ្នេរសមុទ្រ Mar-a-Lago របស់លោក Trump បាននិយាយកាលពីថ្ងៃទី២២ខែធ្នូសប្ដាហ៍មុន ថា ការពិភាក្សានានា ត្រូវរំពឹងថានឹងគ្របដណ្ដប់លើដំណាក់កាលទី២នៃបទឈប់បាញ់ក្នុងដែនដីហ្កាហ្សា ព្រមទាំងអ៊ីរ៉ង់និងក្រុមហេសបូឡាផងដែរ ។

អំពើហិង្សា បានធូរស្រាលប៉ុន្តែពុំបានបញ្ឈប់ការកាប់សម្លាប់មនុស្សទេ ចាប់តាំងពីបទឈប់បាញ់នៅតំបន់ហ្កាហ្សាបានចូលជាធរមាន ហើយការចោទដាក់គ្នាពីការបំពានបទឈប់បាញ់នៅតែបន្ត ។ក្រសួងសុខាភិបាលតំបន់នេះនិយាយថា អ៊ីស្រាអែលបានសម្លាប់មនុស្សជាង៤០០នាក់ក្នុងដែនដីនេះ ខណៈអ៊ីស្រាអែលថា ទាហានរបស់ខ្លួន៣នាក់ត្រូវបានសម្លាប់ក្នុងការវាយប្រហាររបស់ក្រុមសកម្មប្រយុទ្ធ៕