យោធាចិនបានបញ្ចេញ កងទ័ព កងកម្លាំងជើងទឹក អាកាស និងអង្គភាពកងកម្លាំងរ៉ូកែត ជុំវិញ កោះតៃវ៉ាន់ នៅថ្ងៃចន្ទ២៩ធ្នូសប្ដាហ៍នេះ សម្រាប់សមយុទ្ធ មានឈ្មោះថា បេសកកម្មយុត្តិធម៌២០២៥  "Justice Mission 2025" ដែលមានគោលបំណងសាកល្បងការត្រៀមខ្លួនប្រយុទ្ធ និងបញ្ជូនការព្រមាន ដ៏ម៉ឺងម៉ាត់ ប្រឆាំងនឹងការទាមទារឯករាជ្យកោះតៃវ៉ាន់។ 

ទីបញ្ជាការភូមិភាគខាងកើត របស់ចិន បានប្រកាសថា សមយុទ្ធនេះ នឹងចូលរួមដោយលំហាត់សមបាញ់គ្រាប់ពិត នៅថ្ងៃអង្គារ៣០ធ្នូស្អែកនេះ នៅក្នុងសេចក្ដីថ្លែងការមួយ ដោយមានរូបក្រាហ្វិកបង្ហាញពីតំបន់ចំនួន៥ នៅជុំវិញកោះនេះ ដែលនឹងមានការរឹតត្បិតនៅក្រោមសមុទ្រ និងអាកាស រយៈពេល១០ម៉ោង ចាប់ពីម៉ោង៨និង៣០នាទីព្រឹក។   

នេះគឺជាសមយុទ្ធសង្គ្រាមជុំទី៦របស់ចិនចាប់តាំងពីឆ្នាំ ២០២២ បន្ទាប់ពីអតីតប្រធានសភាអាមេរិកលោកស្រី Nancy Pelosi បានទៅទស្សនកិច្ចនៅកោះតៃវ៉ាន់ ហើយបន្ទាប់ពីការកើនឡើងនៃវោហារសាស្ត្ររបស់ចិនជុំវិញការអះអាងសិទ្ធិទឹកដីរបស់ទីក្រុងប៉េកាំង បន្ទាប់ពីនាយករដ្ឋមន្ត្រីជប៉ុន លោកស្រីSanae Takaichi បានលើកឡើងថា ការវាយប្រហារណាមួយរបស់ចិនលើតៃវ៉ាន់អាចបង្កឲ្យមានការឆ្លើយតបយោធាពីទីក្រុងតូក្យូ។

អ្នកនាំពាក្យនៃទីបញ្ជាការភាគខាងកើតរបស់ចិន លោក Shi Yi បាននិយាយក្នុងសេចក្តីថ្លែងការណ៍មួយថា សមយុទ្ធនេះបម្រើជាការព្រមានយ៉ាងធ្ងន់ធ្ងរដល់កងកម្លាំងបំបែកខ្លួន ឯករាជ្យតៃវ៉ាន់ និងកងកម្លាំងជ្រៀតជ្រែកពីខាងក្រៅ។

សមយុទ្ធនេះផ្តោតលើការហ្វឹកហ្វឺនសម្រាប់ការល្បាតត្រៀមប្រយុទ្ធតាមសមុទ្រ និងផ្លូវអាកាស ការទទួលបានការគ្រប់គ្រងរួម ការបិទកំពង់ផែ និងតំបន់សំខាន់ៗ និងការទប់ស្កាត់ផ្សេងៗ៕