អំពើហិង្សានៅភាគខាងលិច និងភាគខាងត្បូងនៃប្រទេសស៊ូដង់ បានធ្វើឲ្យមនុស្សជាង ១០.០០០ នាក់ផ្លាស់ទីលំនៅ ក្នុងរយៈពេល បីថ្ងៃ កាលពីសប្តាហ៍មុន។ នេះបើយោងតាមតួលេខដែលចេញផ្សាយដោយទីភ្នាក់ងារទេសន្តរប្រវេសន៍របស់អង្គការសហប្រជាជាតិកាលពីថ្ងៃអាទិត្យ។

ចាប់តាំងពីខែមេសា ឆ្នាំ ២០២៣ កងទ័ពធម្មតារបស់ប្រទេសស៊ូដង់ និងកងកម្លាំងគាំទ្ររហ័ស (RSF) បានធ្វើអ្វីដែលអង្គការសហប្រជាជាតិហៅថា «សង្គ្រាមដ៏ឃោរឃៅ» ដោយបានសម្លាប់មនុស្សរាប់ម៉ឺននាក់ និងបានបណ្តាលឲ្យមនុស្សជាង ១១ លាននាក់ រត់ភៀសខ្លួន។

នៅចន្លោះថ្ងៃទី ២៥ និង ២៦ ខែធ្នូ ការវាយប្រហារលើភូមិ Um Baru និង Kernoi នៅជិតព្រំដែនខាងលិចរបស់ប្រទេសស៊ូដង់ជាមួយប្រទេសឆាដ បានធ្វើឲ្យមនុស្សជាង ៧.០០០ នាក់ ផ្លាស់ទីលំនៅ។ នេះបើយោងតាមអង្គការទេសន្តរប្រវេសន៍អន្តរជាតិ (IOM)។

បន្ទាប់ពីការដណ្តើមបានកាន់កាប់រដ្ឋធានី El-Fasher ភាគខាងជើងរដ្ឋ Darfur ក្នុងខែតុលា កងកម្លាំង RSF បានរុលចូលទៅភាគខាងលិច ក្នុងរយៈពេលប៉ុន្មានថ្ងៃថ្មីៗនេះ តាមរយៈតំបន់ដែលមានក្រុមជនជាតិភាគតិច Zaghawa រស់នៅ និងគ្រប់គ្រងដោយកងជីវពល។

នៅចន្លោះពេលល្ងាចមុនថ្ងៃបុណ្យណូអែលនិងថ្ងៃសុក្រ មនុស្សចំនួន ៣.១០០នាក់ទៀត ត្រូវបានផ្លាស់ទីលំនៅ ចេញពីទីក្រុង Kadugli ដែលញាំញីដោយទុរ្ភិក្សនៅរដ្ឋ South Kordofan ដែលត្រូវបានឡោមព័ទ្ធដោយកងកម្លាំងយោធាប៉ារ៉ា អស់រយៈពេលជាងមួយឆ្នាំកន្លះ៕