កងកម្លាំងអ៊ីស្រាអែលបានបង្កើនការរឹតបន្តឹងទៅលើភូមិប៉ាឡេស្ទីន នៅក្នុងតំបន់វេសបែង ( West Bank) កាលពីថ្ងៃសៅរ៍ បន្ទាប់ពីមានរបាយការណ៍អំពីបាញ់ប្រហារ ខណៈដែលអាជ្ញាធរសុខាភិបាលហ្កាហ្សាបានធ្វើបច្ចុប្បន្នភាពចំនួនអ្នកស្លាប់នៅក្នុងតំបន់នេះពីជម្លោះដែលកំពុងបន្ត រហូតដល់ជាង ៧១.000 នាក់។

ប្រភពសន្តិសុខប៉ាឡេស្ទីន បាននិយាយថា នៅក្នុងតំបន់វេសបែងភាគកណ្តាល កងកម្លាំងអ៊ីស្រាអែលបានបិទច្រកចូលទៅកាន់ភូមិជាច្រើន នៅជិតទីក្រុងរ៉ាម៉ាឡា ( Ramallah) រួមទាំងភូមិ Ni'lin, Bil'in និង Kharbatha Bani Harith បន្ទាប់ពីការបាញ់ប្រហារត្រូវបានរាយការណ៍នៅជិតប៉ុស្តិ៍ត្រួតពិនិត្យយោធា ដោយបន្ថែមថា ការបិទនេះបានរំខានដល់ការធ្វើដំណើររបស់អ្នកស្រុកនៃភូមិចំនួន ១៣។

ពីដំបូងឡើយ កងទ័ពអ៊ីស្រាអែលបាននិយាយថា ជនជាតិប៉ាឡេស្ទីនម្នាក់ បានបើកការបាញ់ប្រហារនៅជិតប៉ុស្តិ៍ត្រួតពិនិត្យ Hashmonaim ហើយបានរត់គេចខ្លួន ប៉ុន្តែក្រោយមកបាននិយាយថា ហេតុការណ៍នេះ ទាក់ទងនឹង«សកម្មភាពបាញ់ប្រហារ»។ កងកម្លាំងអ៊ីស្រាអែលបន្តប្រតិបត្តិការ ដើម្បីស្វែងរកចាប់ខ្មាន់កាំភ្លើងនោះ និងរឹបអូសអាវុធ។ 

នៅតំបន់វេសបែងភាគខាងជើង កងទ័ពអ៊ីស្រាអែលបានបន្តការឡោមព័ទ្ធយ៉ាងតឹងរ៉ឹងលើទីក្រុង Qabatiya រយៈពេល ២ថ្ងៃ ។ លោក Ahmed Zakarneh អភិបាលក្រុង Qabatiya បាននិយាយថា កងកម្លាំងអ៊ីស្រាអែលបានបិទច្រកចូល ដាក់ចេញនូវបម្រាមគោចរ បំផ្លាញហេដ្ឋារចនាសម្ព័ន្ធ និងបានឆ្មក់ឆែក ផ្ទះជាច្រើនខ្នង៕