មេដឹកនាំហេសបូឡា លោក Naim Qassem កាលពីថ្ងៃអាទិត្យ បាននិយាយថា ការសម្រេច ដើម្បីដកហូតអាវុធពីក្រុមនេះ នៅក្នុងប្រទេសលីបង់ គឺជា «ផែនការរបស់អ៊ីស្រាអែល និងអាមេរិក» ដោយចោទប្រកាន់អ៊ីស្រាអែលថា មិនបានគោរពតាមកិច្ចព្រមព្រៀងឈប់បាញ់ដែលបានចុះហត្ថលេខាកាលពីឆ្នាំមុន។

ក្រោមសម្ពាធយ៉ាងខ្លាំងរបស់សហរដ្ឋអាមេរិក និងការភ័យខ្លាចនៃការវាយប្រហាររបស់អ៊ីស្រាអែលដែលបានពង្រីក យោធាលីបង់ត្រូវបានគេរំពឹងថា នឹងបញ្ចប់ការដកហូតអាវុធរបស់ក្រុមហេសបូឡានៅភាគខាងត្បូងនៃទន្លេ Litani ដែលស្ថិតនៅចម្ងាយប្រហែល ៣០ គីឡូម៉ែត្រ (១៩ ម៉ាយ) ពីព្រំដែនជាមួយអ៊ីស្រា   អែល នៅចុងឆ្នាំនេះ។

បន្ទាប់មកយោធាលីបង់ នឹងដោះស្រាយការដកហូតអាវុធពីចលនាដែលគាំទ្រដោយអ៊ីរ៉ង់ដែលនៅសល់

នៅក្នុងប្រទេសនេះ។

លោក Qassem បាននិយាយថា៖«ការដកហូតអាវុធ គឺជាផែនការរបស់អ៊ីស្រាអែល និងអាមេរិក។

«ការទាមទារការគ្រប់គ្រងអាវុធផ្តាច់មុខ ខណៈពេលដែលអ៊ីស្រាអែលកំពុងប្រព្រឹត្តអំពើឈ្លានពាន ហើយអាមេរិកកំពុងដាក់ឆន្ទៈរបស់ខ្លួនលើលីបង់ ដោយដកហូតអំណាចរបស់ខ្លួន មានន័យថា អ្នកមិនកំពុងធ្វើការ ដើម្បីផលប្រយោជន៍របស់លីបង់ទេ ប៉ុន្តែផ្ទុយទៅវិញ គឺដើម្បីផលប្រយោជន៍នៃអ្វីដែលអ៊ីស្រាអែលចង់បាន»។

ទោះបីជាមានបទឈប់បាញ់ នៅខែវិច្ឆិកា ឆ្នាំ២០២៤ ដែលត្រូវបានគេសន្មត់ថា នឹងបញ្ចប់អរិភាពជាងមួយឆ្នាំ រវាងអ៊ីស្រាអែល និងក្រុមហេសបូឡាដែលគាំទ្រដោយអ៊ីរ៉ង់ក៏ដោយ ក៏អ៊ីស្រាអែលនៅតែបន្តវាយប្រហារលើប្រទេសលីបង់ និងរក្សាកងទ័ពនៅក្នុងតំបន់ចំនួន ៥ ដែលអ៊ីស្រាអែលចាត់ទុកថា ជាយុទ្ធសាស្ត្រ៕