អាជ្ញាធរនៃតំបន់នេះ បាននិយាយថា ការរំលោភបំពានបទឈប់បាញ់ហ្កាហ្សា ជិត ៩៧០ ដង ដោយ អ៊ីស្រាអែលត្រូវបានរាយការណ៍ ចាប់តាំងពីថ្ងៃទី ១០ ខែតុលា នៅពេលដែលបទឈប់បាញ់ បានចូលជាធរមាន។ 

ដូច្នេះ ក្នុងរយៈពេលនេះ អ៊ីស្រាអែលត្រូវបានគេរាយការណ៍ថា បានរំលោភលើបទឈប់បាញ់ចំនួន ៩៦៩ ដង រួមទាំងការវាយប្រហារតាមអាកាស និងកាំភ្លើងធំចំនួន ៤៥៥ ដង និងការវាយប្រហារដោយគ្រាប់ផ្លោងចំនួន ២៩៨ លើក ទៅលើជនស៊ីវិល និងផ្ទះសម្បែងរបស់ពួកគេ ដែលបានសម្លាប់មនុស្ស ៤១៨ នាក់ និងបណ្តាលឲ្យមនុស្សជាង ១.១៤០ នាក់ រងរបួស។

អាជ្ញាធរនៃដែនដីនេះ បានចោទប្រកាន់អ៊ីស្រាអែលថា បានរារាំងការដឹកជញ្ជូនមនុស្សធម៌ទៅកាន់តំបន់ហ្កាហ្សា ទោះបីជាមានកិច្ចព្រមព្រៀងដែលមានស្រាប់ក៏ដោយ។ ដូច្នេះ ពួកគេអះអាងថា តំបន់នេះ បានទទួលទំនិញមនុស្សធម៌ត្រឹមតែ ៤២% ប៉ុណ្ណោះដែលខ្លួនត្រូវការ ដើម្បីបំពេញតម្រូវការជាមូលដ្ឋានរបស់ប្រជាជនរបស់ខ្លួន។ អាជ្ញាធរបាននិយាយថា ប្រជាជននៅក្នុងតំបន់ហ្កាហ្សា កំពុងប្រឈមមុខនឹងការខ្វះខាតស្បៀងអាហារ ថ្នាំពេទ្យ ទឹកស្អាត និងប្រេងឥន្ធនៈយ៉ាងធ្ងន់ធ្ងរ ដោយបន្ថែមថា វិបត្តិនេះ កាន់តែអាក្រក់ឡើងៗ ស្របពេលអាកាសធាតុត្រជាក់ក្នុងរដូវរងា។

ភាពតានតឹងបានផ្ទុះឡើងនៅមជ្ឈិមបូព៌ានៅថ្ងៃទី ០៧ ខែតុលា ឆ្នាំ ២០២៣ នៅពេលដែលក្រុមសកម្មប្រយុទ្ធមកពីចលនាប៉ាឡេស្ទីនហាម៉ាស ដែលមានមូលដ្ឋាននៅតំបន់ហ្កាហ្សាស្ទ្រីប បានបើកការវាយប្រហារគួរឲ្យភ្ញាក់ផ្អើលទៅលើអ៊ីស្រាអែល ដោយបានសម្លាប់ប្រជាជននៅតំបន់ព្រំដែន និងចាប់ចំណាប់ថ្នូរជាង ២៥០នាក់។ ជាការឆ្លើយតប អ៊ីស្រាអែលបានចាប់ផ្តើមប្រតិបត្តិការយោធា នៅក្នុងដែនដី ប៉ាឡេស្ទីន ដើម្បីរុះរើរចនាសម្ព័ន្ធយោធា និងនយោបាយរបស់ក្រុមហាម៉ាស និងដោះលែងចំណាប់ខ្មាំងទាំងអស់៕