ទូរទស្សន៍រដ្ឋបានរាយការណ៍ថា អ៊ីរ៉ង់បានបាញ់បង្ហោះផ្កាយរណបសង្កេតការណ៍ចំនួន បីគ្រឿង ដែលផលិតក្នុងស្រុកទៅកាន់លំហអាកាសចេញពីប្រទេសរុស្ស៊ី កាលពីថ្ងៃអាទិត្យ ដែលជាជំហានថ្មីមួយសម្រាប់កម្មវិធីអវកាសរបស់ទីក្រុងតេអេរ៉ង់ ទោះបីជាមានទណ្ឌកម្មពីលោកខាងលិចក៏ដោយ។

ប្រទេសនេះ អះអាងថា ឧស្សាហកម្មអវកាសរបស់ខ្លួនមានសន្តិភាព និងគោរពតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិដែលដាក់លើកម្មវិធីនុយក្លេអ៊ែររបស់ខ្លួន។

ទូរទស្សន៍អ៊ីរ៉ង់បានរាយការណ៍ថា៖«ផ្កាយរណបអ៊ីរ៉ង់ចំនួន បីគ្រឿង គឺ Zafar-2, Paya និង Kowsar 1.5 ត្រូវបានបាញ់បង្ហោះទៅកាន់លំហអាកាសដោយរ៉ូកែត Soyuz ចេញពីស្ថានីយបាញបង្ហោះ Vostochny Cosmodrome ក្នុងប្រទេសរុស្ស៊ី»។

ទីភ្នាក់ងារសារព័ត៌មានផ្លូវការ IRNA បាននិយាយថា ផ្កាយរណបទាំងនោះ នឹងត្រូវប្រើប្រាស់សម្រាប់ សង្កេតការណ៍» ហើយត្រូវបានផលិតដោយ «វិស័យឯកជន»។

សារព័ត៌មាន IRNA បានបញ្ជាក់ថា Paya គឺជាផ្កាយរណបថតរូបភាពដែលផលិតក្នុងស្រុកទំនើបបំផុតរបស់អ៊ីរ៉ង់ ដោយប្រើប្រាស់បញ្ញាសិប្បនិម្មិត (AI) ដើម្បីកែលម្អគុណភាពបង្ហាញរូបភាព។

សារព័ត៌មាននេះ បានបន្ថែមថា ផ្កាយរណបនេះ នឹងផ្តោតលើការគ្រប់គ្រងធនធានទឹក ការត្រួតពិនិត្យបរិស្ថាន និងការគូសផែនទី។

យោងតាមទីភ្នាក់ងារសារព័ត៌មាន Fars បានឲ្យដឹងថា ប្រព័ន្ធបាញ់បង្ហោះ Soyuz របស់រុស្ស៊ី ត្រូវបានជ្រើសរើស ព្រោះវាជាប្រព័ន្ធបាញ់បង្ហោះផ្កាយរណបដែលអាចទុកចិត្តបំផុតមួយ ក្នុងពិភពលោកសម្រាប់ការជញ្ជូនផ្កាយរណបដែលបំពាក់ដោយឧបករណ៍ទំនើបនិងមានភាពជាក់លាក់កម្រិតខ្ពស់៕