ប្រធានាធិបតីកូរ៉េខាងត្បូង លោក Lee Jae Myung នៅថ្ងៃចន្ទ (ទី២៩ ខែធ្នូ) បានសុំអភ័យទោស ចំពោះក្រុមគ្រួសារនៃជនរងគ្រោះ ១៧៩នាក់ ដែលបានបាត់បង់ជីវិត នៅក្នុងហេតុការណ៍ធ្លាក់យន្តហោះរបស់ក្រុមអាកាសចរណ៍ Jeju Air កាលពីមួយឆ្នាំមុន ដោយប្តេជ្ញារកឲ្យឃើញមូលហេតុពិត ដែលនាំឲ្យកើតឧបទ្ទវហេតុយន្តហោះដ៏អាក្រក់បំផុត នៅលើដីរបស់ប្រទេសនេះ។

ក្នុងសារដែលត្រូវបានចេញផ្សាយនៅថ្ងៃចន្ទនេះ លោក Lee បានលើកឡើងថា៖ «ក្នុងនាមជាប្រធានាធិបតី ដែលមានការទទួលខុសត្រូវ ក្នុងការការពារអាយុជីវិត និងសុវត្ថិភាពរបស់ប្រជាជន ខ្ញុំសុំអភ័យទោសយ៉ាងស្មោះអស់ពីចិត្តរបស់ខ្ញុំ»។

សូមបញ្ជាក់ថា សាច់ញាតិរបស់ជនរងគ្រោះ បានទាមទារឲ្យផ្ដល់ចម្លើយ អំពីឧបទ្ទវហេតុនេះ បន្ទាប់ពីអ្នកស៊ើបអង្កេត បានពន្យារពេលការចេញរបាយការណ៍ ស្តីពីអ្វីដែលជាកំហុសឆ្គង កាលពីថ្ងៃទី២៩ ខែធ្នូ ឆ្នាំ២០២៤ នៅពេលដែលយន្តហោះរបស់ក្រុមហ៊ុនអាកាសចរណ៍ Jeju Air បានជួបគ្រោះថ្នាក់ពេលចុះចត ដោយរត់ហួសផ្លូវរត់ ហើយទៅបុកនឹងឃឿនបេតុងយ៉ាងទំហឹង។

នាពេលនោះ យន្តហោះនោះបានផ្ទុះឆេះ ដែលបានផ្ដាច់ជីវិតមនុស្សទាំងអស់ លើកលេងតែ ២នាក់ ក្នុងចំណោមមនុស្ស ១៨១នាក់ជិះនៅលើនោះ។ ក្រុមប្រឹក្សាស៊ើបអង្កេតគ្រោះថ្នាក់អាកាសចរណ៍ និងផ្លូវដែកដែលដឹកនាំដោយរដ្ឋាភិបាល បានឲ្យដឹងនៅក្នុងរបាយការណ៍បឋមមួយក្នុងខែមករាថា ម៉ាស៊ីនទាំង២ របស់យន្តហោះ ត្រូវបានវាយប្រហារដោយបក្សី។ ប៉ុន្តែមន្ទិលសង្ស័យនៅតែមាន ពាក់ព័ន្ធនឹងបញ្ហាសុវត្ថិភាព ការរចនាផ្លូវរត់នៅអាកាសយានដ្ឋានអន្តរជាតិ Muan ជាកន្លែងដែលគ្រោះថ្នាក់បានកើតឡើង ហើយនិងសកម្មភាពអ្វីខ្លះដែលអ្នកបើកបរយន្តហោះ បានធ្វើនៅក្នុងប៉ុន្មាននាទីចុងក្រោយនៃការហោះហើរ នាពេលនោះ។

ក្រៅពីពាក្យសុំអភ័យទោស លោក Lee បានបញ្ជាក់បន្ថែមថា៖ «គ្រោះមហន្តរាយបានបង្ហាញយ៉ាងច្បាស់ពីបញ្ហាជាប្រព័ន្ធ និងដែនកំណត់នៃសង្គមរបស់យើង។ អ្វីដែលត្រូវការចាំបាច់នាពេលនេះ មិនមែនជាពាក្យសន្យាឲ្យតែបាន ឬពាក្យសម្ដីឲ្យតែមាននោះទេ ប៉ុន្តែជំនួសមកវិញ គឺការផ្លាស់ប្តូរ និងសកម្មភាពពិតប្រាកដ»៕