លោកសាស្ត្រាចារ្យ Peter Kuznick នាយកវិទ្យាស្ថានសិក្សានុយក្លេអ៊ែរ នៅសាកលវិទ្យាល័យអាមេរិក ក្នុងទីក្រុងវ៉ាស៊ីនតោន បានប្រាប់សារព័ត៌មាន TASS ខណៈពេលកំពុងធ្វើអត្ថាធិប្បាយអំពីកិច្ចប្រជុំរបស់លោក ត្រាំ ជាមួយលោក វ្ល៉ូឌីមី ហ្សេឡិនស្គី កាលពីថ្ងៃទី ២៨ ខែធ្នូ ថា ប្រធានាធិបតីអាមេរិក លោក ដូណាល់ ត្រាំ ( Donald Trump) បានទទួលស្គាល់ពីតម្រូវការក្នុងការដោះស្រាយមូលហេតុចម្បងនៃជម្លោះអ៊ុយក្រែន ក៏ដូចជាបន្ទាត់ក្រហមរបស់រុស្ស៊ី នៅក្នុងដំណើរការដោះស្រាយ។ 

តាមទស្សនៈរបស់លោក មេដឹកនាំអាមេរិករូបនេះ ពិតជាច្បាស់ណាស់ថា « មានការគោរព និងការចូលចិត្តចំពោះ ប្រធានាធិបតីរុស្ស៊ី លោក វ្ល៉ាឌីមៀ ពូទីន ច្រើនជាងលោក ហ្សេឡិនស្គី»។ លោក Kuznick បានកត់សម្គាល់៖«ចំណាប់អារម្មណ៍របស់ខ្ញុំ គឺថា លោក ត្រាំ យល់ស្របនឹងបន្ទាត់ក្រហមរបស់លោក ពូទីន និងការទទូចអំពីការដោះស្រាយមូលហេតុចម្បងនៃវិបត្តិអ៊ុយក្រែន ហើយនៅតែជឿជាក់ថា លោក ពូទីន មានប្រៀបជាង ហើយនឹងឈ្នះនៅទីបំផុតនៅលើសមរភូមិនូវអ្វីដែលលោក ហ្សេឡិនស្គី បដិសេធមិនលះបង់នៅតុចរចា»។ 

អ្នកជំនាញរូបនេះ បាននិយាយថា៖«ការពិភាក្សាអំពីការត្រូវធ្វើប្រជាមតិនៅអ៊ុយក្រែន ដើម្បីអនុម័តការផ្លាស់ប្តូរទឹកដីណាមួយ បានបង្ហាញដល់ខ្ញុំថា លោក ត្រាំ បានសង្កត់ធ្ងន់ថា នៅទីបំផុត អ៊ុយក្រែននឹងត្រូវបំពេញតាមការទាមទាររបស់រុស្ស៊ីដែលឲ្យខ្លួនលះបង់ការគ្រប់គ្រងទាំងស្រុងនូវតំបន់Donbass»។ លោកបានបន្ថែមថា លោក ត្រាំ និងលោក ហ្សេឡិនស្គី បានបរាជ័យក្នុងការឈានដល់ការឯកភាពគ្នាលើការធានាសន្តិសុខ និងការគ្រប់គ្រងលើរោងចក្រថាមពលនុយក្លេអ៊ែរ Zaporozhye៕