មេដឹកនាំរបស់ប្រទេសជប៉ុន លោកស្រី Sanae Takaichi បានផ្លាស់ទៅកាន់និវេសនដ្ឋានផ្លូវការរបស់នាយករដ្ឋមន្ត្រីហើយ នៅថ្ងៃចន្ទ (ទី២៩ ខែធ្នូ) នេះ ពោលគឺរយៈពេល ២ខែបន្ទាប់ពីលោកស្រីឡើងកាន់តំណែង។

ចាប់តាំងពីបានក្លាយជានាយករដ្ឋមន្ត្រីស្ត្រីដំបូងរបស់ជប៉ុន ក្នុងខែតុលា លោកស្រី Takaichi បានធ្វើដំណើរទៅកាន់ការិយាល័យនាយករដ្ឋមន្ត្រីដោយរថយន្តពីកន្លែងស្នាក់របស់សមាជិកសភា ក្នុងសង្កាត់ Akasaka របស់ទីក្រុងតូក្យូ ដែលត្រូវចំណាយពេលក្នុងរង្វង់ប៉ុន្មាននាទី។

ភ្លាមៗបន្ទាប់ពីចាប់ផ្ដើមកាន់តួនាទី លោកស្រី Takaichi មានគម្រោងផ្លាស់ទៅនិវេសនដ្ឋានផ្លូវការ ដែលដើរប្រហែលតែ ១នាទី ពីការិយាល័យរបស់នាយករដ្ឋមន្ត្រី។ តែបើយោងតាមប្រភពពីអ្នកនៅជុំវិញនាយករដ្ឋមន្ត្រី បានឲ្យដឹងថា កាលវិភាគការទូត និងសភាដ៏មមាញឹកដំបូង បានធ្វើឲ្យការផ្លាស់នេះត្រូវបានពន្យារពេល។

ការរៀបចំការស្នាក់នៅពីមុនរបស់លោកស្រី Takaichi ត្រូវបានរិះគន់ដោយមេដឹកនាំក្រុមប្រឆាំង គឺគណបក្សរដ្ឋធម្មនុញ្ញនៃប្រទេសជប៉ុន និងជាអតីតនាយករដ្ឋមន្ត្រី លោក Yoshihiko Noda បន្ទាប់ពីបានទៅដល់ការិយាល័យប្រហែល ៣៥នាទី បន្ទាប់ពីមានរញ្ជួយដីដ៏ខ្លាំងមួយ នៅភាគឦសានជប៉ុន កាលពីយប់ថ្ងៃទី៨ ខែធ្នូ។

ការទៅដល់យឺតរបស់នាយករដ្ឋមន្ត្រីរូបនេះ នាពេលនោះ គឺដោយសារតែរថយន្តផ្លូវការរបស់លោកស្រីមិនឃើញទៅដល់ ហើយលោកស្រីត្រូវបានបើកបរជូនទៅកាន់ការិយាល័យដោយអង្គរក្ស៕