ក្រសួងការបរទេស នៅថ្ងៃចន្ទ (ទី២៩ ខែធ្នូ) នេះ បានឲ្យដឹងថា ប្រទេសចិនប្រឆាំងជំទាស់នឹងការប៉ុនប៉ងណាមួយ ដើម្បីបំបែកទឹកដីនៅក្នុងប្រទេសសូម៉ាលី ដោយបញ្ជាក់ពីការគាំទ្ររបស់ចិន ចំពោះអធិបតេយ្យភាព ឯកភាព និងបូរណភាពដែនដីរបស់ប្រទេសអាហ្វ្រិកខាងកើតមួយនេះ។

នៅក្នុងសន្និសីទសារព័ត៌មានប្រចាំថ្ងៃ អមដោយការជំរុញឲ្យអាជ្ញាធរ ក្នុងដែនដី Somaliland បញ្ឈប់វិធានការផ្ដាច់ខ្លួន និងឃុបឃិតជាមួយកម្លាំងខាងក្រៅ អ្នកនាំពាក្យក្រសួង លោក Lin Jian បានប្រាប់អ្នកសារព័ត៌មានថា៖ «គ្មានប្រទេសណាមួយគួរតែជំរុញ ឬគាំទ្រកងកម្លាំងផ្ដាច់ខ្លួនផ្ទៃក្នុងរបស់ប្រទេសផ្សេងទៀត សម្រាប់ផលប្រយោជន៍អាត្មានិយមផ្ទាល់ខ្លួននោះឡើយ»។

គួរបញ្ជាក់ងា អ៊ីស្រាអែលបានក្លាយជាប្រទេសដំបូងគេ កាលពីថ្ងៃសុក្រសប្ដាហ៍កន្លងមក ដែលទទួលស្គាល់ជាផ្លូវការនូវសាធារណរដ្ឋ Somaliland ដែលប្រកាសដោយខ្លួនឯងថា ជារដ្ឋឯករាជ្យ និងអធិបតេយ្យ ដោយស្វែងរកកិច្ចសហប្រតិបត្តិការជាបន្ទាន់ជាមួយដែនដី Somaliland លើផ្នែកវិស័យកសិកម្ម សុខភាព បច្ចេកវិទ្យា និងសេដ្ឋកិច្ច។

Somaliland បានប្រកាសឯករាជ្យពីប្រទេសសូម៉ាលី ក្នុងឆ្នាំ១៩៩១ ហើយបានធ្វើការជារដ្ឋជាក់ស្តែងអស់រយៈពេលជាង ៣ទសវត្សរ៍មកហើយ ប៉ុន្តែនៅមុននេះ មិនទទួលបានការទទួលស្គាល់ជាផ្លូវការ ពីសំណាក់រដ្ឋសមាជិកអង្គការសហប្រជាជាតិណាមួយឡើយ៕