បើយោងតាមសេចក្ដីរាយការណ៍ពីប្រព័ន្ធផ្សព្វផ្សាយក្នុងស្រុក បានឲ្យដឹងថា យោធាកូរ៉េខាងត្បូង បានបញ្ជាក់ថា ខ្លួនបានបញ្ចប់សមយុទ្ធយោធារួមគ្នាទាំងអស់ជាមួយសហរដ្ឋអាមេរិក ជាការហាត់សមធ្វើសង្គ្រាមដែលត្រូវបានពន្យារពេលកាលពីខែសីហាឆ្នាំនេះ។

សារព័ត៌មាន Yonhap News បានរាយការណ៍នៅថ្ងៃចន្ទ (ទី២៩ ខែធ្នូ) នេះថា នាយសេនាធិការចម្រុះ (JCS) បានប្រាប់ឲ្យដឹងថា ខ្លួនបានបញ្ចប់ហ្វឺកហ្វឹនចំនួន ២២ ក្នុងចំណោមសមយុទ្ធលើទីលានជាក់ស្ដែង ៤០។ JCS បានបញ្ជាក់បន្ថែមថា៖ «ដើម្បីធានាឲ្យមានលំនឹងការត្រៀមលក្ខណៈយោធាប្រកបដោយតុល្យភាពពេញមួយឆ្នាំ និងរក្សាលក្ខខណ្ឌល្អប្រសើរបំផុត សម្រាប់ការហ្វឹកហ្វឺន យើងបានរៀបចំឡើងវិញចំនួន ២២ នៃសមយុទ្ធរួមគ្នាប្រហែល ៤០ ហើយបានបញ្ចប់នៅចុងឆ្នាំ»។

កាលពីខែសីហា កូរ៉េខាងត្បូង បានពន្យារពេលផ្នែកខ្លះនៃសមយុទ្ធរួមគ្នាជាមួយសហរដ្ឋអាមេរិកនេះ ដោយបញ្ជាក់ថា ស្ទើរតែពាក់កណ្តាលនៃសមយុទ្ធចំនួន ៤០ ដែលបានគ្រោងទុក នឹងត្រូវពន្យារពេលទៅខែបន្ទាប់។ យោធាបានលើកឡើងពីកត្តាជាច្រើន ពាក់ព័ន្ធការពន្យារពេលនេះ ដែលរួមមានទាំងរលកកម្ដៅក្នុងរដូវក្តៅ និងអត្ថប្រយោជន៍នៃការពង្រីកសមយុទ្ធពេញមួយឆ្នាំ ដើម្បីធ្វើឲ្យការត្រៀមខ្លួនកាន់តែប្រសើរឡើង។

តែការសម្រេច កាលពីខែសីហា ត្រូវបានគេមើលឃើញថា ជាកាយវិការមួយពីរដ្ឋបាលរបស់ប្រធានាធិបតី លោក Lee Jae Myung ក្នុងការធ្វើឲ្យប្រសើរឡើងនូវទំនាក់ទំនងដ៏តានតឹងយូរអង្វែងជាមួយទីក្រុងព្យុងយ៉ាង និងស្តារកិច្ចសហប្រតិបត្តិការអន្តរកូរ៉េឡើងវិញ។

គួរដឹងថា ទាហានអាមេរិកជាង ២៨.៥០០នាក់ ឈរជើងនៅកូរ៉េខាងត្បូង ក្រោមសន្ធិសញ្ញាការពារជាតិទ្វេភាគី ខណៈដែលសង្រ្គាមអន្តរកូរ៉េនៃទសវត្សរ៍ឆ្នាំ១៩៥០ បានបញ្ចប់ដោយការឈប់បាញ់បណ្ដោះអាសន្ន មិនមែនជាបទឈប់បាញ់ផ្លូវការនោះទេ ដោយធ្វើឲ្យប្រទេសកូរ៉េទាំង២ ដោយលក្ខណៈបច្ចេកទេស នៅតែស្ថិតក្នុងការមានសង្រ្គាមជាមួយគ្នា៕