រុស្ស៊ី កាលពីថ្ងៃចន្ទ (២៩ ធ្នូ) បានចោទប្រកាន់អ៊ុយក្រែន ថាបានព្យាយាមវាយប្រហារនិវេសនដ្ឋានរបស់លោកប្រធានាធិបតី Vladimir Putin នៅភាគខាងជើងនៃប្រទេសរុស្ស៊ី ប៉ុន្តែមិនិបានផ្តល់ភស្តុតាងដើម្បីគាំទ្រការអះអាងនេះឡើយ ក្នុងអ្វីដែលទីក្រុងគីវបានច្រានចោលថា គ្មានមូលដ្ឋាន និងត្រូវបានរៀបចំឡើងដើម្បីបំផ្លាញកិច្ចចរចាសន្តិភាព។

ការចោទដាក់គ្នាទៅវិញទៅមកទាំងកំហឹង — ដោយរួមទាំងការលើកឡើងរបស់រុស្ស៊ីដែលថា ខ្លួនកំពុងពិនិត្យឡើងវិញនូវជំហរក្នុងកិច្ចចរចាដើម្បីឆ្លើយតបនឹងការវាយប្រហារនោះ — បានក្លាយជាជំហានថយក្រោយថ្មីមួយដល់ចក្ខុវិស័យសម្រាប់សន្តិភាពនៅអ៊ុយក្រែន។ លោកប្រធានាធិបតីអាមេរិក Donald Trump បាននិយាយថា លោក Putin បានប្រាប់លោកពីការវាយប្រហារដែលត្រូវចោទប្រកាន់នោះ នៅក្នុងកិច្ចសន្ទនាតាមទូរសព្ទមួយកាលពីព្រឹកថ្ងៃចន្ទ ដែលក៏បានធ្វើលោកខឹងសម្បារណាស់ ប៉ុន្តែទោះយ៉ាងនេះក្ដី លោក Trump បានបញ្ជាក់ជាថ្មីពីជំនឿចិត្តរបស់លោកថា កិច្ចព្រមព្រៀងសន្តិភាពអាចនឹងខិតជិតមកដល់ហើយ។

រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយថា អ៊ុយក្រែន ព្យាយាមវាយប្រហារនិវេសនដ្ឋានដ្ឋានរបស់លោក Putin នៅក្នុងតំបន់ Novgorod ភាគខាងលិចទីក្រុងមូស្គូ នៅថ្ងៃទី ២៨-២៩ ខែធ្នូ ដោយប្រើយានដ្រូនរយៈចម្ងាយឆ្ងាយចំនួន ៩១គ្រឿង ដែលយានទាំងអស់នោះត្រូវបានបំផ្លាញដោយប្រព័ន្ធការពារដែនអាកាសរបស់រុស្ស៊ី។

ប្រធានាធិបតីអ៊ុយក្រែន លោក Volodymyr Zelenskyy បានបដិសេធថា អ៊ុយក្រែនមិនបានគ្រោងទុកការវាយប្រហារបែបនេះទេ ដោយចោទទៅរុស្ស៊ីវិញថា កំពុងរៀបចំផែនការវាយប្រហារអគាររដ្ឋាភិបាលនៅទីក្រុងគីវ ហើយសង្កត់ធ្ងន់ថា រុស្ស៊ីចង់ធ្វើឱ្យខូចដល់វឌ្ឍនភាពក្នុងកិច្ចចរចារវាងសហរដ្ឋអាមេរិក និងអ៊ុយក្រែន ស្តីពីការបញ្ចប់សង្គ្រាម៕