ភ្នំុពេញ ៖ លោកជំទាវ បណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ ស្នើដល់យុវជន ត្រូវស្គាល់នូវអ្វីដែលជាវប្បធម៌ជាតិ ដោយធ្វើយ៉ាងណាឲ្យការអភិរក្ស ទៅជាការអភិវឌ្ឍន៍ ព្រោះថាវប្បធម៌ ត្រូវថែរក្សាផង និងធ្វើឲ្យរីកចម្រើនទៅមុខទៀត ដើម្បីចូលរួមអភិវឌ្ឍន៍នូវសេដ្ឋកិច្ចជាតិ។

​ការថ្លែងរបស់របស់លោកជំទាវ បណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ យ៉ាងដូច្នេះ ពិធីបើកទិវាវប្បធម៌ជាតិ លើកទី២៤ ក្រោមប្រធានបទ“យុវជនដើម្បីវប្បធម៌ជាតិ”នាសាលសន្និសីទចតុម្មុខ ព្រឹកថ្ងៃទី៣ ខែមីនា ឆ្នាំ២០២២នេះ ក្រោមអធិបតីភាពរបស់លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាតំណាងដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ 

លោកជំទាវ រដ្ឋមន្រី្ត បានលើកឡើងទៀតថា ទិវាវប្បធម៌ជាតិ ៣មីនា ជានិច្ចកាលនៅតែជាទិវាមួយ ដ៏មានតម្លៃនៅក្នុងការលើកកម្ពស់ ក្នុងការថែរក្សានូវអ្វីដែលជាមរតករបស់ដូនតាយើង។ ជាការពិតក្នុងវិបតិ្តកូវីដ-១៩ កាលពីឆ្នាំ២០២១កន្លងមកនេះ យើងមិនបានរៀបចំទិវាវប្បធម៌ជាតិ៣មីនា។ ដូច្នេះឆ្នាំ២០២២នេះ សភាពការណ៍មានការធូរស្រាលបន្តិច ប៉ុន្តែមិនមែនជាការធ្វេសប្រហែសនោះទេ។ 

លោកជំទាវ បណ្ឌិតសភាចារ្យ ភឿង សកុណា បានបន្តទៀតថា កម្លាំងយុវជនគឺជាសក្តានុពលធនធានមនុស្សដ៏សំខាន់មិនអាចខ្វះបាននៅក្នុងការរួមចំណែកអភិរក្សនិងអភិវឌ្ឍវប្បធម៌ជាតិ ហើយក៏ជាមូលដ្ឋានគ្រឹះសម្រាប់ការអភិវឌ្ឍសង្គមជាតិផងដែរ។ ក្នុងបរិបទនៃការរីកចម្រើនបែបឌីជីថលជាសាកលនៅក្នុងសតវត្សរ៍ទី២១នេះ យុវជនកម្ពុជាមិនត្រឹមតែត្រូវមានការអប់រំ ការបណ្ដុះបណ្តាលជំនាញវិជ្ជាជីវៈ និងចំណេះដឹងផ្នែកបច្ចេកវិទ្យាប្រកបដោយគុណភាព និងសមធម៌ប៉ុណ្ណោះនោះទេ ប៉ុន្តែក៏ត្រូវចូលរួមយ៉ាងពេញលេញក្នុងសកម្មភាពសិល្បៈវប្បធម៌ ទាំងក្នុងទិដ្ឋភាពសង្គម និងទិដ្ឋភាពសេដ្ឋកិច្ចផងដែរ៕អត្ថបទ ៖ រដ្ឋា