ប្រទេសចិន បានចាប់ផ្តើមសមយុទ្ធបាញ់គ្រាប់ពិតរយៈពេល ១០ម៉ោង ជុំវិញកោះតៃវ៉ាន់ នៅថ្ងៃអង្គារ (៣០ ធ្នូ) នេះ ក្នុងថ្ងៃទីពីរនៃហ្គេមសង្គ្រាមដ៏ធំបំផុតរបស់ទីក្រុងប៉េកាំងនៅជុំវិញកោះ ដែលមានបំណងកាត់ផ្តាច់ទំនាក់ទំនងរបស់តំបន់នេះយ៉ាងឆាប់រហ័សពីការគាំទ្រខាងក្រៅ ក្នុងករណីមានជម្លោះ។

បញ្ជាការភាគខាងកើតរបស់កងទ័ពចិន បាននិយាយថា សមយុទ្ធនេះនឹងធ្វើឡើងរហូតដល់ម៉ោង ៦ ល្ងាច (ម៉ោងក្នុងស្រុក) នៅក្នុងសមុទ្រ និងដែនអាកាសនៃទីតាំងចំនួន៥ ជុំវិញកោះ ដោយបង្ហាញពីការប្តេជ្ញាចិត្តរបស់យោធាចិន ក្នុងការ «ប្រយុទ្ធប្រឆាំងនឹងពួកផ្ដាច់ខ្លួននិយម និងលើកកម្ពស់ការបង្រួបបង្រួមដោយមិនស្ទាក់ស្ទើរ»។

រដ្ឋបាលសុវត្ថិភាពដែនសមុទ្រចិន កាលពីថ្ងៃចន្ទ បានកំណត់តំបន់ពីរបន្ថែមទៀត ដែលសមយុទ្ធបាញ់គ្រាប់ពិតនឹងត្រូវធ្វើឡើង ដោយធ្វើឱ្យហ្គេមសង្រ្គាមឈ្មោះថា "បេសកកម្មយុត្តិធម៌ ២០២៥" នេះ ក្លាយជាសមយុទ្ធដ៏ធំបំផុតរហូតមកដល់បច្ចុប្បន្ន គិតតាមការគ្របដណ្តប់សរុប និងនៅក្នុងតំបន់ដែលនៅជិតកោះតៃវ៉ាន់ ជាងសមយុទ្ធមុនៗ។

យោធាចិន និយាយថា ខ្លួនបានដាក់ពង្រាយនាវាពិឃាត យន្តហោះទម្លាក់គ្រាប់បែក និងអង្គភាពផ្សេងៗទៀត ដើម្បីហ្វឹកហាត់ប្រតិបត្តិការតាមសមុទ្រ ការពារដែនអាកាស និងប្រឆាំងនាវាមុជទឹក នៅថ្ងៃអង្គារនេះ ដើម្បី «សាកល្បងសមត្ថភាពរបស់កងទ័ពជើងទឹក និងកងទ័ពអាកាស ក្នុងការសម្របសម្រួល សម្រាប់ការទប់ស្កាត់ និងការគ្រប់គ្រងរួមបញ្ចូលគ្នា»។

សមយុទ្ធទ្រង់ទ្រាយធំនេះបានចាប់ផ្តើមរយៈពេល ១១ថ្ងៃ បន្ទាប់ពីសហរដ្ឋអាមេរិកបានប្រកាសកញ្ចប់អាវុធដ៏ច្រើនសន្ធឹកសន្ធាប់តម្លៃ ១១,១ពាន់លានដុល្លារអាមេរិកដល់កោះតៃវ៉ាន់ ដែលធ្វើឱ្យក្រសួងការពារជាតិចិន មិនពេញចិត្តយ៉ាងខ្លាំង និងព្រមានថា យោធាចិននឹង «ចាត់វិធានការយ៉ាងខ្លាំងក្លា» ជាការឆ្លើយតប៕