ប្រធានាធិបតីរុស្ស៊ី លោក Vladimir Putin កាលពីថ្ងៃចន្ទ (២៩ ធ្នូ) បានប្រាប់កងទ័ពរបស់លោកឱ្យជំរុញយុទ្ធនាការកាន់តែខ្លាំងឡើង ដើម្បីដណ្ដើមការគ្រប់គ្រងទាំងស្រុងលើតំបន់ Zaporizhzhia នៅភាគខាងត្បូងរបស់អ៊ុយក្រែន រួមទាំងតំបន់ Donbas នៅភាគខាងកើតដ៏ធំល្វឹងល្វើយ បន្ទាប់ពីមេបញ្ជាការរុស្ស៊ីមួយរូបបាននិយាយថា កងកម្លាំងរបស់ទីក្រុងមូស្គូ ស្ថិតនៅចម្ងាយ ១៥គីឡូម៉ែត្រប៉ុណ្ណោះ ពីទីក្រុងធំបំផុតរបស់តំបន់ Zaporizhzhia។

លោក Putin បានធ្វើអត្ថាធិប្បាយបែបនេះក្នុងកិច្ចប្រជុំវិមានក្រឹមឡាំង ជាមួយក្រុមមេបញ្ជាការយោធាជាន់ខ្ពស់ និងលោក Andrei Belousov រដ្ឋមន្ត្រីក្រសួងការពារជាតិ។ សុន្ទរកថានេះបានកើតឡើងរយៈពេលមួយថ្ងៃប៉ុណ្ណោះ បន្ទាប់ពីលោក Putin បានសន្ទនាតាមទូរសព្ទជាមួយប្រធានាធិបតីអាមេរិក ស្ដីពីដំណើរការកិច្ចព្រមព្រៀងសន្តិភាពនៅអ៊ុយក្រែន។

ឧត្តមសេនីយ៍ឯក Mikhail Teplinsky មេបញ្ជាការក្រុមយោធាមួយរបស់រុស្ស៊ី បានប្រាប់លោក Putin ថា កងកម្លាំងរុស្ស៊ី កំពុងខិតជិតដល់ទីក្រុង Zaporizhzhia ដែលមានឈ្មោះដូចតំបន់ដ៏ធំមួយនេះ និងជាទីក្រុងដែលមានប្រជាជនមុនសង្គ្រាមជាង ៧សែននាក់។ រុស្ស៊ីគ្រប់គ្រងប្រហែល ៧៥% ទៅហើយនៃតំបន់ Zaporizhzhia ទាំងមូល ហើយតំបន់នេះជាខេត្តមួយក្នុងចំណោមខេត្តអ៊ុយក្រែនចំនួន៤ ដែលលោក Putin អះអាងក្នុងឆ្នាំ២០២២ថា ជាផ្នែកមួយរបស់រុស្ស៊ី។

នៅថ្ងៃចន្ទដដែលនោះ លោក Putin ក៏បាននិយាយថា រុស្ស៊ីត្រូវតែបន្តប្រតិបត្តិការវាយលុក ដើម្បីដណ្ដើមការគ្រប់គ្រងពេញលេញលើតំបន់ Donbas ដ៏សំខាន់។ ឧត្តមសេនីយ៍ Valery Gerasimov ប្រធាននាយសេនាធិការកងទ័ពរុស្ស៊ី ធ្លាប់បានប្រាប់លោក Putin ថា កងកម្លាំងរបស់ទីក្រុងមូស្គូ កំពុងរុលទៅមុខស្ទើរតែគ្រប់ខ្សែបន្ទាត់ជួរមុខទាំងអស់ ខណៈកងកម្លាំងរបស់អ៊ុយក្រែន កំពុងផ្តោតលើការការពារ និងព្យាយាមទប់ការវាយប្រហារ៕