ព្យុះរដូវរងា ឈ្មោះថា Ezra បានរំខានដល់ការធ្វើដំណើរវិស្សមកាលនៅទូទាំងភាគឦសានសហរដ្ឋអាមេរិក តំបន់កណ្ដាលប៉ែកខាងលិច និងតំបន់ Great Lakes ដ៏ធំល្វឹងល្វើយ សម្រាប់ថ្ងៃទីបីជាប់ៗគ្នា កាលពីថ្ងៃចន្ទ (២៩ ធ្នូ) ដែលបណ្តាលឱ្យជើងហោះហើររាប់ពាន់ជើងត្រូវពន្យារពេល និងការលុបចោលរាប់រយជើងផ្សេងទៀត ខណៈក្រុមឧតុនិយមបានព្រមានពី "ព្យុះស៊ីក្លូន បម" (Bomb Cyclone) ដ៏មានឥទ្ធិពល ដែលអាចធ្វើឱ្យការធ្វើដំណើរកាន់តែចលាចល មុនថ្ងៃឈប់សម្រាកឆ្នាំថ្មី។

យោងតាមគេហទំព័រតាមដានជើងហោះហើរ FlightAware បានឱ្យដឹងថា ជើងហោះហើរជិត ៦.០០០ជើង ត្រូវបានពន្យារពេល និងចំនួន ៧៥១ជើង ត្រូវបានលុបចោល គិតត្រឹមរសៀលថ្ងៃចន្ទ (ពេលវេលាក្នុងស្រុក)។ ចាប់តាំងពីថ្ងៃសុក្រសប្ដាហ៍មុនមក ការរំខានមកពីអាកាសធាតុ បានលុបចោលជើងហោះហើរជាង ៣.៦០០ជើង និងការពន្យារពេលជាង ៣០.០០០ជើងហោះហើរ រួចមកហើយ។

ព្យុះរដូវរងានេះបានវាយប្រហារក្នុងអំឡុងពេលធ្វើដំណើរដ៏មមាញឹកបំផុតមួយនៃឆ្នាំ ពោលគឺ ស្របពេលថ្ងៃបុណ្យនិងការឈប់សម្រាកជាច្រើន។ អ្នកធ្វើដំណើរវិស្សមកាល បានជួបប្រទះការរង់ចាំដ៏យូរ ការពិបាកកក់សំបុត្រឡើងវិញ និងបញ្ហាប្រឈមកន្លែងស្នាក់នៅ ខណៈក្រុមហ៊ុនអាកាសចរណ៍ កំពុងទប់ទល់នឹងអាកាសធាតុរដូវរងាធ្ងន់ធ្ងរ។

ក្រុមអ្នកឧតុនិយមមកពីស្ថាប័នអាកាសធាតុ AccuWeather បានព្រមានថា ព្យុះដ៏ខ្លាំងក្លានេះនឹងកាន់តែកើនកម្លាំងខ្លាំងដូចគ្រាប់បែកដ៏ធំ ទៅជា "ព្យុះស៊ីក្លូន បម" រហូតដល់យប់ថ្ងៃចន្ទ ដោយនាំមកនូវស្ថានភាពព្យុះព្រិល សំណុំទឹកកកដ៏គ្រោះថ្នាក់ ភ្លៀងធ្លាក់ខ្លាំង និងខ្យល់កន្រ្តាក់ ចាប់ពីរដ្ឋ Wisconsin ដល់រដ្ឋ Maine របស់សហរដ្ឋអាមេរិក៕