មេបញ្ជាការកងកម្លាំងប្រដាប់អាវុធស៊ូដង់(SAF)មានសម្ព័ន្ធភាពជាមួយរដ្ឋាភិបាល បានទទូចថា សង្គ្រាម ដែលបច្ចុប្បន្នឈានចូលដល់ឆ្នាំទីបីនឹងបញ្ចប់ទៅដោយការ«ចុះចាញ់»របស់កងកម្លាំងគាំទ្ររហ័ស (RSF) ប៉ុណ្ណោះ។

ជំហរខ្ពស់របស់ឧត្តមសេនីយ៍ Abdel Fattah al-Burhan ប្រឆាំងនឹងកងកម្លាំងយោធាប៉ារ៉ាដែលជាគូប្រជែង បានធ្វើឡើងខណៈប្រទេសហែកហួរដោយសង្គ្រាមមួយនេះកំពុងប្រឈមនឹងការឆ្លើយតបមនុស្សធម៌ដែលដួលរលំ ដោយមានភាពស្រេកឃ្លាន និងការជម្លៀសខ្លួននៅក្រោមភ្លើងឆាបឆេះយ៉ាងសន្ធោសន្ធៅ និងការប្រយុទ្ធកាន់តែខ្លាំងឡើង ដែលកំពុងប្រែក្លាយភូមិនានាទៅជា «ទីក្រុងខ្មោច»។

និយាយក្នុងដំណើរទស្សនកិច្ចជាផ្លូវការទៅកាន់ទីក្រុង Ankara ប្រទេសទួរគី លោក al-Burhan បានបដិសេធដោយង្ខេបអំពីលទ្ធភាពនៃដំណោះស្រាយនយោបាយដែលមិនពាក់ព័ន្ធនឹងការរំសាយអាវុធរបស់កងកម្លាំងគាំទ្ររហ័ស(RSF)។

លោក al-Burhan បានប្រាប់សមាជិកសហគមន៍ស៊ូដង់នៅទួរគី ថា «យើងមិននិយាយអំពីដំណោះស្រាយយោធាទេ យើងបាននិយាយថា ដំណោះស្រាយយោធាមិនបញ្ចប់ជាចាំបាច់ដោយការប្រយុទ្ធគ្នាទេ។ វាអាចបញ្ចប់ដោយការចុះចាញ់»។ លោកបាននិយាយបន្ថែមថា «សង្គ្រាមនឹងបញ្ចប់បន្ទាប់ពី អាវុធត្រូវបានដាក់ចុះ»។

អគ្គលេខាធិការអង្គការសហប្រជាជាតិ លោក Antonio Guterres បានអំពាវនាវឲ្យមានបទឈប់បាញ់ជាបន្ទាន់នៅក្នុងសង្គ្រាមស៊ីវិលដ៏ង្ហូរឈាមនៅប្រទេសស៊ូដង់ ដែលអង្គការសហប្រជាជាតិនិយាយថា បានបង្កើតវិបត្តិមនុស្សធម៌អាក្រក់បំផុតរបស់ពិភពលោក។