រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយក្នុងបទសម្ភាសន៍មួយចេញផ្សាយនៅយប់ថ្ងៃចន្ទ (២៩ ធ្នូ) ថា លោកខាងលិចត្រូវតែយល់ថា រុស្ស៊ីមានជំហរនាំមុខជាយុទ្ធសាស្ត្រនៅក្នុងសមរភូមិអ៊ុយក្រែន ខណៈកិច្ចពិភាក្សាស្វែងរកលទ្ធភាពដោះស្រាយជម្លោះកំពុងដំណើរការទៅមុខ ប៉ុន្តែស្ថិតក្នុងដំណាក់កាលដ៏តឹងតែងបំផុត។

នៅក្នុងបទសម្ភាសន៍យ៉ាងទូលំទូលាយជាមួយទីភ្នាក់ងារសារព័ត៌មានរដ្ឋ RIA លោក Lavrov បាននិយាយថា ទីក្រុងមូស្គូ ក៏កំពុងរង់ចាំការឆ្លើយតបពីសហរដ្ឋអាមេរិក ចំពោះសំណើរបស់លោកប្រធានាធិបតីរុស្ស៊ី Vladimir Putin កាលពីខែកញ្ញា ក្នុងការពង្រីកដែនកំណត់រយៈពេល ១ឆ្នាំ លើកិច្ចព្រមព្រៀងអាវុធយុទ្ធសាស្ត្រមួយ។

លោក Lavrov បានប្រាប់ទីភ្នាក់ងារសារព័ត៌មាន RIA ថា អ៊ុយក្រែន និងបណ្តាប្រទេសលោកខាងលិច ត្រូវតែទទួលយកការពិតដែលថា រុស្ស៊ីបានប្រកាន់ខ្ជាប់នូវការមានប្រៀបលើសមរភូមិ ខណៈខួបលើកទី៤ នៃប្រតិបត្តិការយោធារបស់រុស្ស៊ី ឆ្នាំ២០២២ លើអ៊ុយក្រែន កាន់តែខិតជិតមកដល់។

ប្រមុខការទូតរុស្ស៊ីរូបនេះបន្តថា អ៊ុយក្រែន និងលោកខាងលិចត្រូវគិតគូរពីស្ថានភាពជាក់ស្តែងនៅនឹងកន្លែង - ពោលគឺ រុស្ស៊ីកាន់កាប់ទឹកដីអ៊ុយក្រែនប្រហែល ១៩% ហើយ ហើយក៏បានបញ្ចូលតំបន់ចំនួន៤ នៃប្រទេសនេះជាឧបសម្ព័ន្ធ។ លោក Lavrov បានសង្កត់ធ្ងន់ម្តងទៀតថា ដំណោះស្រាយមួយនៅក្នុងជម្លោះ គឺទាមទារឱ្យបញ្ចប់គំនិតណាមួយនៃវត្តមានរបស់សម្ព័ន្ធយោធាណាតូ នៅអ៊ុយក្រែន ហើយថា អ៊ុយក្រែនត្រូវតែប្រកាន់យកឋានៈអព្យាក្រឹត និងមិនចូលបក្សសម្ព័ន្ធរបស់ខ្លួន៕