ខណៈការប្រយុទ្ធគ្នាកាន់តែខ្លាំងឡើងក្នុងរយៈពេលប៉ុន្មានថ្ងៃថ្មីៗនេះនៅជុំវិញទីក្រុង Uvira ភាគខាងកើតសាធារណរដ្ឋប្រជាធិបតេយ្យកុងហ្គោ(DRC) ជនស៊ីវិលកុងហ្គោរាប់ម៉ឺននាក់បានភៀសខ្លួនចេញពីលំនៅឋានរបស់ពួកគេ ដោយស្វែងរកទីសុវត្ថិភាពនៅក្នុងប្រទេសប៊ូរុនឌី ដែលនៅជិតខាង។

ចាប់តាំងពីដើមខែធ្នូមក ពលរដ្ឋកុងហ្គោជិត ៩០.០០០នាក់ បានឆ្លងចូលទៅក្នុងប្រទេសប៊ូរុនឌី។

លោក Billy Kanana ជនភៀសខ្លួនកុងហ្គោម្នាក់បាននិយាយថា «យើងបានគេចចេញពីសាធារណរដ្ឋប្រជាធិបតេយ្យកុងហ្គោទៅកាន់ប្រទេសប៊ូរុនឌី តាមផ្លូវទឹក។ ខ្ញុំមកទីនេះដោយរត់គេចពីគ្រាប់កាំភ្លើង និងការសម្លាប់។ ខ្ញុំចង់ស្វែងរកជីវិតសុខសាន្ត»។

លំហូរចូលភ្លាមៗនេះ កំពុងដាក់សម្ពាធយ៉ាងខ្លាំងទៅលើហេដ្ឋារចនាសម្ព័ន្ធដែលមានស្រាប់នៅក្នុងប្រទេសប៊ូរុនឌី ដោយធនធានដែលមានលើសពីសមត្ថភាព។ ដូច្នេះ ការអំពាវនាវបន្ទាន់ពីរដ្ឋាភិបាលប្រទេសប៊ូរុនឌី សម្រាប់សាមគ្គីភាពជាតិនិងអន្តរជាតិ ត្រូវបានចេញដើម្បីគាំទ្រដល់កិច្ចខិតខំប្រឹងប្រែងជាបន្តបន្ទាប់ដើម្បីដោះស្រាយវិបត្តិមនុស្សធម៌នេះ។

យោងតាមឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR)បានឲ្យដឹងថា មជ្ឈមណ្ឌលឆ្លងកាត់ និងទីតាំងលំនៅឋានក្រៅផ្លូវការ នៅក្នុងប្រទេសប៊ូរុនឌី ដែលទទួលអ្នកទៅដល់ថ្មីបានដំណើរការលើសពីសមត្ថភាពអតិបរមា រួចទៅហើយ។ កង្វះទឹកធ្ងន់ធ្ងរ និងស្ថានភាពអនាម័យ កាន់តែយ៉ាប់យ៉ឺនកំពុងបង្កើនហានិភ័យនៃការផ្ទុះឡើងជំងឺដូចជាជំងឺអាសន្នរោគ និងជំងឺអុតស្វា ជាដើម។