ប្រធានាធិបតីអាមេរិក លោក ដូណាល់ ត្រាំ (Donald Trump) បាននិយាយកាលពីថ្ងៃចន្ទថា លោកកំពុងពិចារណាលក់យន្តហោះចម្បាំង F-35 ដ៏ទំនើបបំផុត ទៅឲ្យប្រទេសទួរគី ក្នុងអំឡុងពេលដំណើរទស្សនកិច្ចរបស់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ដែលប្រឆាំងយ៉ាងដាច់អហង្ការចំពោះការសម្រេចនេះ។

ដោយត្រូវសួរអំពីកិច្ចព្រមព្រៀងយន្តហោះចម្បាំង F-35 សម្រាប់ប្រទេសទួរគី លោក ត្រាំ បាននិយាយនៅពេលដែលលោកបានជួបជាមួយលោក ណេតាន់យ៉ាហ៊ូ នៅក្លិប Florida របស់មេដឹកនាំអាមេរិករូបនេះថា៖«យើងកំពុងគិតអំពីរឿងនេះយ៉ាងម៉ត់ចត់»។

សហរដ្ឋអាមេរិកបានដកប្រទេសទួរគីចេញពីកម្មវិធីអភិវឌ្ឍន៍យន្តហោះ F-35 ដែលជាយន្តហោះបំបាំងកាយលំដាប់កំពូល ក្នុងឆ្នាំ ២០១៩ បន្ទាប់ពីសម្ព័ន្ធមិត្តរបស់អង្គការណាតូនេះ បានបន្តទិញប្រព័ន្ធការពារមីស៊ីលពីរុស្ស៊ី។

ទោះជាយ៉ាងណាក៏ដោយ លោក ត្រាំ មានទំនាក់ទំនងដ៏កក់ក្តៅជាមួយប្រធានាធិបតីទួរគី លោក រ៉េសិប តាយីប អឺដូហ្កាន់ (Recep Tayyip Erdogan) ទោះបីជាមេដឹកនាំឥស្លាមនិយមចាស់វស្សារូបនេះ បានថ្កោលទោសយ៉ាងដាច់អហង្ការចំពោះការវាយលុកដ៏បំផ្លិចបំផ្លាញរបស់អ៊ីស្រាអែល នៅក្នុងតំបន់ហ្កាហ្សាក៏ដោយ។

អ្នករៀបចំគោលនយោបាយអ៊ីស្រាអែល អះអាងថា យន្តហោះ F-35 នឹងផ្តល់អត្ថប្រយោជន៍ដល់ប្រទេសទួរគី នៅក្នុងសង្គ្រាមដែលអាចកើតមាន។ អ៊ីស្រាអែលនិងប្រទេសទួរគី មានការខ្វែងគំនិតគ្នាចំពោះប្រទេសស៊ីរីដែលរងការបំផ្លិចបំផ្លាញដោយសង្គ្រាម ដែលជាប្រទេសជិតខាងនឹងប្រទេសទាំងពីរនេះ៕