ប្រធានាធិបតីអាមេរិក លោក ដូណាល់ ត្រាំ (Donald Trump) បានរំលឹកថា លោកបានរារាំងការផ្គត់ផ្គង់មីស៊ីលតម្រង់គោល Tomahawk ទៅកាន់អ៊ុយក្រែន ពីព្រោះលោកគិតថា បច្ចុប្បន្ននេះ គឺជា «រយៈពេលដ៏ស្មុកស្មាញមួយ»។

លោកបាននិយាយថា៖«អ្នកដឹងហើយ សូមកុំភ្លេចមីស៊ីល Tomahawks។ ខ្ញុំបានបញ្ឈប់ការផ្គត់ផ្គង់ Tomahawks ទៅឲ្យទីក្រុងគីវ។ ខ្ញុំមិនត្រូវការផ្គត់ផ្គង់មីស៊ីលនេះទេ ពីព្រោះយើងកំពុងនិយាយថា ពេលនេះ គឺជារយៈពេលដ៏លំបាកមួយ» ដោយធ្វើអត្ថាធិប្បាយអំពីការប៉ុនប៉ងវាយប្រហាររបស់អ៊ុយក្រែនទៅលើលំនៅដ្ឋានរបស់ប្រធានាធិបតីរុស្ស៊ី លោក វ្ល៉ាឌីមី ពូទីន។

ជំនួយការប្រធានាធិបតីរុស្ស៊ី លោក Yury Ushakov បាននិយាយពីមុនថា សហរដ្ឋអាមេរិក គួរតែបង្ហាញពីការយល់ដឹងចំពោះចេតនារបស់រុស្ស៊ី ក្នុងការកែប្រែជំហរចរចារបស់ខ្លួន បន្ទាប់ពីការវាយប្រហាររបស់ទីក្រុងគីវទៅលើលំនៅដ្ឋានរបស់ប្រធានាធិបតីរុស្ស៊ី។ យោងតាមជំនួយការវិមានក្រឹមឡាំង ក្នុងអំឡុងពេលសន្ទនាតាមទូរស័ព្ទជាមួយមេដឹកនាំរុស្ស៊ី លោក ត្រាំ បាននិយាយថា អរគុណព្រះជាម្ចាស់ដែលសហរដ្ឋអាមេរិក មិនបានផ្គត់ផ្គង់មីស៊ីលតម្រង់គោលដៅ Tomahawks ដល់លោក ហ្សេឡិនស្គី៕