ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃចន្ទ (២៩ ធ្នូ) ថា រូបលោក និងនាយករដ្ឋមន្ត្រីអ៊ីស្រាអែល Benjamin Netanyahu ពុំបានយល់ស្របគ្នាទាំងស្រុងនោះទេ លើបញ្ហាតំបន់ West Bank ដែលកាន់កាប់ដោយអ៊ីស្រាអែល ប៉ុន្តែប្រធានាធិបតីរូបនេះមិនបានបញ្ជាក់ទេថា តើការខ្វែងគំនិតនោះគឺជាអ្វីឡើយ បន្ទាប់ពីកិច្ចប្រជុំជាមួយលោក Netanyahu នៅរដ្ឋ Florida។

នៅក្នុងសន្និសីទសារព័ត៌មានមួយ លោក Trump ត្រូវបានអ្នកសារព័ត៌មានសាកសួរថា «តើលោកមានសារអ្វីទៅកាន់លោក Netanyahu អំពីតំបន់ West Bank» ហើយថា «តើលោកបារម្ភពីអំពើហិង្សារបស់អ្នកតាំងលំនៅអ៊ីស្រាអែល នៅតំបន់ West Bank អាចធ្វើឱ្យប៉ះពាល់ដល់សន្តិភាពដែរឬទេ»។

ជាការឆ្លើយតប លោក Trump បាននិយាយថា «ភាគីទាំងពីរបានធ្វើកិច្ចពិភាក្សាដ៏ធំមួយ អស់រយៈពេលដ៏យូរ លើបញ្ហាតំបន់ West Bank ហើយទោះជាភាគីទាំងពីរមិនយល់ស្របគ្នា ១០០% ក្ដី ប៉ុន្តែក៏បានឈានដល់ការសន្និដ្ឋានមួយផងដែរលើតំបន់នេះ» ដោយមិនបញ្ជាក់ច្បាស់ៗឡើយ។

អ៊ីស្រាអែល បានស្ថិតក្រោមសម្ពាធអន្តរជាតិកាន់តែខ្លាំងឡើង ដែលអំពាវនាវឱ្យខ្លួនទប់ស្កាត់ការវាយប្រហារដោយអ្នកតាំងលំនៅ ទៅលើប្រជាជនប៉ាឡេស្ទីន ក្នុងតំបន់ West Bank។ តំបន់កាន់កាប់ដែលមានប្រជាជនប៉ាឡេស្ទីនចំនួន ២,៧លាននាក់នេះ គឺជាទីតាំងស្នូលយូរមកហើយនៃផែនការសម្រាប់រដ្ឋប៉ាឡេស្ទីននាពេលអនាគត រួមជាមួយអ៊ីស្រាអែល៕