ប្រធានទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA) បានប្រាប់ឲ្យដឹងថា យ៉ាងហោចណាស់ប្រជាជនប៉ាឡេស្ទីន ២៣៥.០០០នាក់ នៅតំបន់ហ្កាហ្សា បានរងផលប៉ះពាល់ដោយវិបត្តិរដូវរងា «បង្កើតឡើងដោយកត្តាមនុស្ស» ដែលបណ្តាលមកពីសង្រ្គាមរបស់អ៊ីស្រាអែល ការផ្លាស់ទីលំនៅដ៏ធំ និងការបំផ្លិចបំផ្លាញហេដ្ឋារចនាសម្ព័ន្ធស៊ីវិល ខណៈប្រព័ន្ធអាកាសសម្ពាធទាប បានបក់បោកលើដែនដីដែលរងការបំផ្លិចបំផ្លាញយ៉ាងខ្ទេចខ្ទំរួទៅហើយ។

អគ្គស្នងការ UNRWA លោក Philippe Lazzarini បានរៀបរាប់ប់នៅលើបណ្ដាញសង្គម X កាលពីថ្ងៃចន្ទ (ទី២៩ ខែធ្នូ) ថា៖ «សង្រ្គាមជាច្រើនខែ និងការផ្លាស់ទីលំនៅ បានបង្ខំប្រជាជននៅតំបន់ហ្កាហ្សាឲ្យរស់នៅក្នុងបំណែកបាក់បែកជាជម្រកបណ្តោះអាសន្ន ឬនៅក្នុងតង់មិនរឹងមាំល្អ»។

លោក Lazzarini បានសង្កត់ធ្ងន់ថា៖ «ខណៈពេលដែលព្យុះ Byron ដែលបានបោកបក់លើតំបន់ហ្កាហ្សា កាលពីថ្ងៃទី១០ ខែធ្នូ គឺជាគ្រោះថ្នាក់ធម្មជាតិ ផលវិបាករបស់វាកើតឡើងដោយកត្តាមនុស្ស»។

លោក Lazzarini បានឲ្យដឹងបន្ថែមថា ភ្លៀងធ្លាក់ខ្លាំង និងខ្យល់បក់ខ្លាំង ដែលបង្កឡើងដោយប្រព័ន្ធអាកាសធាតុសម្ពាធទាប បានបណ្តាលឲ្យមានការដួលរលំអគារចំនួន ១៧ខ្នង និងការខូចខាតទាំងស្រុង ឬដោយផ្នែក ចំពោះតង់ ឬជម្រកបណ្តោះអាសន្នជាង ៤២.០០០ ហើយប៉ះពាល់ដល់មនុស្សយ៉ាងហោចណាស់ ២៣៥.០០០នាក់ នៅចន្លោះថ្ងៃទី១០ និងទី១៧ ខែធ្នូ។

លក្ខខណ្ឌអាកាសធាតុ បង្កគ្រោះថ្នាក់យ៉ាងខ្លាំងដល់ជនភៀសខ្លួនប៉ាឡេស្ទីន ដែលកំពុងរស់នៅក្នុងតង់ដាច់ដាច ឬអគារហានិភ័យខ្ពស់ដែលរងការខូចខាតយ៉ាងធ្ងន់ធ្ងរ និងដែលស្ថិតនៅក្រោមការវាយប្រហាររបស់អ៊ីស្រាអែលម្តងហើយម្តងទៀត ចាប់តាំងពីខែតុលា ឆ្នាំ២០២៣៕