មន្ទីរបញ្ចកោណបានផ្តល់កិច្ចសន្យាដល់ក្រុមហ៊ុន Boeing ដែលមានតម្លៃចំនួន ៨,៦ពាន់លានដុល្លារ សម្រាប់កម្មវិធី F-15 Israel Programme ដែលរួមមានការផលិត និងការបញ្ជូនយន្តហោះចម្បាំងថ្មី សម្រាប់កងទ័ពអាកាសអ៊ីស្រាអែល។

នៅក្នុងសេចក្តីថ្លែងការណ៍មួយកាលពីថ្ងៃចន្ទ (ទី២៩ ខែធ្នូ) មន្ទីរបញ្ចកោណ បានឲ្យដឹងថា កិច្ចសន្យានេះ គ្របដណ្តប់លើការរចនា ការរួមបញ្ចូល ការធ្វើតេស្ត ការផលិត និងការបញ្ចូនចែកចាយយន្តហោះ F-15IA ថ្មីចំនួន ២៥គ្រឿង ដោយមានជម្រើសផលិតយន្តហោះ ២៥គ្រឿងបន្ថែម។

មន្ទីរបញ្ចកោណបានបញ្ជាក់ថា៖ «កិច្ចសន្យានេះគ្របដណ្ដប់លើការរចនា ការដាក់បញ្ចូល ការរៀបចំឧបករណ៍ ការធ្វើតេស្ត ការផលិត និងការបញ្ជូនចែកចាយយន្តហោះ F-15IA ថ្មីចំនួន ២៥គ្រឿង សម្រាប់កងទ័ពអាកាសអ៊ីស្រាអែល ដោយមានជម្រើសផលិតយន្តហោះ F-15IA ចំនួន ២៥គ្រឿងបន្ថែមទៀត»។

បើយោងតាមស្ថាប័ននេះបានឲ្យដឹងបន្ថែមថា ការងារលើកម្មវិធីនេះ នឹងត្រូវបានអនុវត្តនៅក្នុងរដ្ឋ Missouri សហរដ្ឋអាមេរិក ហើយត្រូវបានគេរំពឹងថា នឹងបញ្ចប់ត្រឹមថ្ងៃទី៣១ ខែធ្នូ ឆ្នាំ២០៣៥។

គួរបញ្ជាក់ថា ការប្រកាសនេះធ្វើឡើងបន្ទាប់ពីមានជំនួប រវាងប្រធានាធិបតីអាមេរិក លោក Donald Trump និងនាយករដ្ឋមន្ត្រីអ៊ីស្រាអែល លោក Benjamin Netanyahu នៅរដ្ឋ Florida។ អំឡុងដំណើរទស្សនកិច្ចនេះ លោក Netanyahu ក៏បានជួបពិភាក្សាបិទទ្វារជាមួយរដ្ឋមន្ត្រីការពារជាតិអាមេរិក លោក Pete Hegseth ផងដែរ៕