ស៊ីហ្គេម៖ កិច្ចប្រជុំក្រុមប្រឹក្សាកីឡាអាស៊ីអាគ្នេយ៍ (SEAGF-Council) លើកដំបូងនៅកម្ពុជានឹងត្រូវរៀបចំនាថ្ងៃទី០៨ ដល់ថ្ងៃទី១០ ខែមេសា ឆ្នាំ២០២២ ខាងមុខនៅខេត្តសៀមរាប ខណៈមន្ដ្រីជាន់ខ្ពស់នៃគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានចាត់ទុកជាវេទិកាដ៏សំខាន់ សម្រាប់កម្ពុជាក្នុងដំណើរឆ្ពោះទៅព្រឹត្តិការណ៍ប្រវត្តិសាស្ដ្រស៊ីហ្គេម-អាស៊ានប៉ារ៉ាហ្គេមឆ្នាំ២០២៣ នៅកម្ពុជា។
នេះបើតាមការបញ្ជាក់របស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC ក្រោយបញ្ចប់កិច្ចប្រជុំប្រចាំរបស់គណៈអចិន្ដ្រៃយ៍ CAMSOC នៅទីស្នាក់ការគណៈកម្មាធិការជាតិអូឡាំពិកកម្ពុជា និងតាមប្រព័ន្ធ Zoom ក្រោមវត្តមានឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ដ្រៃយ៍គណៈកម្មាធិការជាតិ CAMSOC កាលពីថ្ងៃទី០៣ ខែមីនា ឆ្នាំ២០២២ ម្សិលមិញ។ ឯកឧត្តម វ៉ាត់ ចំរើន មានប្រសាសន៍ថា នេះជាលើកដំបូងហើយដែលកិច្ចប្រជុំក្រុមប្រឹក្សាកីឡាអាស៊ីអាគ្នេយ៍ ត្រូវរៀបចំដោយផ្ទាល់ មានន័យថា សមាជិកទាំងអស់ ត្រូវចូលរួមផ្ទាល់នៅកម្ពុជា បន្ទាប់ពីកិច្ចប្រជុំនេះបានធ្វើតាមប្រព័ន្ធ Online ជាយូរមកហើយដោយសារបញ្ហាកូវីដ-១៩ ហើយក៏ជាលើកដំបូងដែលកម្ពុជាដឹកនាំកិច្ចប្រជុំនេះ បន្ទាប់ពីឯកឧត្ដមបណ្ឌិត ថោង ខុន ត្រូវបានតែងតាំងជាប្រធានក្រុមប្រឹក្សាកីឡាអាស៊ីអាគ្នេយ៍។
ឯកឧត្តមបន្ដថា កិច្ចប្រជុំនេះគឺជាវេទិកាដ៏សំខាន់សម្រាប់ម្ចាស់ផ្ទះកម្ពុជា និងបណ្ដាប្រទេសមាជិកត្រូវធ្វើការជជែក និងពិភាក្សាគ្នាអំពីវឌ្ឍនភាពនៃដំណើរឆ្ពោះទៅការប្រកួតកីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣ នៅកម្ពុជា ពិសេសខេត្តសៀមរាបមិនត្រឹមតែជាគោលដៅត្រៀមធ្វើម្ចាស់ផ្ទះ ការប្រកួតលើប្រភេទកីឡាមួយចំនួនប៉ុណ្ណោះទេ តែក៏ជាកន្លែងសុំភ្លើងគប់សម្រាប់ពិធីបើកព្រឹត្តិការណ៍ប្រវត្តិសាស្ដ្រនេះដែរ។ សូមបញ្ជាក់ថា កិច្ចប្រជុំក្រុមប្រឹក្សាកីឡាអាស៊ីអាគ្នេយ៍នេះអាចកើតឡើងនៅកម្ពុជាបាន បន្ទាប់ពីឯកឧត្តមបណ្ឌិត ថោង ខុន ក្នុងនាមប្រធានគណៈកម្មាធិការជាតិអូឡាំពិកកម្ពុជា ត្រូវបានតែងតាំងជាប្រធានក្រុមប្រឹក្សាកីឡាអាស៊ីអាគ្នេយ៍កាលពីថ្ងៃទី០៧ ខែធ្នូ ឆ្នាំ២០២១ កន្លងទៅ ដើម្បរៀបចំ និងដឹកនាំកិច្ចប្រជុំផ្សេងៗក្នុងដំណើរឆ្ពោះទៅ រៀបចំការប្រកួតកីឡាស៊ីហ្គេមលើកទី៣២ ដែលនឹងប្រព្រឹត្តទៅចាប់ពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ និងការប្រកួតកីឡាអាស៊ានប៉ារ៉ាហ្គេមលើកទី១២ ដែលគ្រោងប្រកួតពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣ ដដែល៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
