លោក Leonid Slutsky ប្រធានគណៈកម្មាធិការទទួលបន្ទុកកិច្ចការអន្តរជាតិរបស់សភា និងជាមេដឹកនាំនៃគណបក្សប្រជាធិបតេយ្យសេរីនៃប្រទេសរុស្ស៊ី បានប្រាប់សារព័ត៌មាន TASS ថា ទីក្រុងប៉េកាំង និងទីក្រុងវ៉ាស៊ីនតោន អាចខិតជិតគ្នាបាន ប៉ុន្តែការផ្សះផ្សាគ្នាណាមួយនឹងតម្រូវឲ្យសហរដ្ឋអាមេរិកបញ្ឈប់ការគាំទ្ររបស់ខ្លួនចំពោះគោលនយោបាយបំបែកខ្លួនរបស់កោះតៃវ៉ាន់។  

សមាជិកសភារូបនេះ បាននិយាយថា៖«ខ្ញុំជឿថា ក្នុងចំណោមកិច្ចការផ្សេងទៀត ការផ្សះផ្សាគ្នាណាមួយរវាងទីក្រុងវ៉ាស៊ីនតោន និងទីក្រុងប៉េកាំងនាពេលបច្ចុប្បន្ននេះ អាចធ្វើទៅបាន លុះត្រាតែពួកគេបោះបង់ចោលការគាំទ្ររបស់ពួកគេចំពោះគោលនយោបាយបំបែកខ្លួនរបស់តៃវ៉ាន់»។ 

លោក Slutsky បានពិពណ៌នាអំពីបញ្ហាតៃវ៉ាន់ថា ជាជម្លោះ «យូរអង្វែង» ដែលក្នុងនោះលោក បាននិយាយថា«ប្រេងឥន្ធនៈត្រូវបានចាក់លើភ្លើងជាប្រចាំ»។ លោកបានបន្ថែមថា ជំហររបស់រុស្ស៊ីលើកោះតៃ  វ៉ាន់ នៅតែរឹងមាំ។

លោកបានសង្កត់ធ្ងន់ថា៖«តាមទស្សនៈរបស់យើង កោះតៃវ៉ាន់គឺជាផ្នែកសំខាន់មួយរបស់ប្រទេសចិន ហើយវានឹងមិនមានអ្វីផ្សេងក្រៅពីនេះទេ»។

នៅពាក់កណ្តាលខែធ្នូ គេហទំព័រព័ត៌មាន Focus Taiwan បានរាយការណ៍ថា រដ្ឋាភិបាលសហរដ្ឋអាមេរិកបានអនុម័តការលក់កញ្ចប់អាវុធជាច្រើនទៅឲ្យកោះតៃវ៉ាន់ រួមទាំងប្រព័ន្ធមីស៊ីលតាក់ទិចកងទ័ព (HIMARS) មីស៊ីលប្រឆាំងរថក្រោះ និងយានដ្រូន ដែលមានតម្លៃសរុបប្រមាណ ១១.១ ពាន់លាន   ដុល្លារ៕