បើតាមការវាយតម្លៃសេដ្ឋកិច្ចចុងឆ្នាំរបស់រដ្ឋាភិបាល ប៉ាន់ប្រមាណថា ឥណ្ឌាបានវ៉ាជប៉ុន ក្នុងនាមជាមហាអំណាចសេដ្ឋកិច្ចទី៤ របស់ពិភពលោក ហើយក្រុមមន្ត្រីរបស់ប្រទេសនេះ សង្ឃឹមថា នឹងឡើងទៅនៅពីលើអាល្លឺម៉ង់ ក្នុងរង្វង់រយៈពេល ៣ឆ្នាំ។

តែយ៉ាងណាក្ដី ការបញ្ជាក់ផ្លូវការ គឺផ្អែកលើទិន្នន័យដែលគ្រោងនឹងមាននៅឆ្នាំ២០២៦ នៅពេលដែលតួលេខផលិតផលក្នុងស្រុកសរុប (GDP) ប្រចាំឆ្នាំចុងក្រោយ ត្រូវបានចេញផ្សាយ ដោយមូលនិធិរូបិយវត្ថុអន្តរជាតិ (IMF) លើកឡើងថា ឥណ្ឌានឹងវ៉ាប្រទេសជប៉ុន នៅឆ្នាំក្រោយ។

របាយការណ៍សង្ខេបសេដ្ឋកិច្ចរបស់រដ្ឋាភិបាល ដែលបានចេញផ្សាយកាលពីល្ងាចថ្ងៃចន្ទ (ទី២៩ ខែធ្នូ) បានបង្ហាញថា៖ «ឥណ្ឌាស្ថិតក្នុងចំណោមប្រទេសសេដ្ឋកិច្ចធំៗ ដែលមានកំណើនលឿនបំផុតរបស់ពិភពលោក ហើយស្ថិតក្នុងស្ថានភាពរឹងមាំល្អ ក្នុងការទ្រទ្រង់ដល់សន្ទុះនេះ»។

របាយការណ៍នេះ បានបន្ថែមថា៖ «ដោយ GDP ដែលមានតម្លៃ ៤,១៨សែនកោដិដុល្លារ ឥណ្ឌាបានវ៉ាដាច់ជប៉ុន ដើម្បីក្លាយជាប្រទេសដែលមានសេដ្ឋកិច្ចធំជាងគេទី៤ របស់ពិភពលោក ហើយនឹងត្រៀមខ្លួនឡើងទៅជំនួសប្រទេសអាល្លឺម៉ង់ នៅចំណាត់ថ្នាក់ទី៣ ក្នុងរយៈពេល ២ឆ្នាំកន្លះ ទៅ ៣ឆ្នាំខាងមុខ ដោយ GDP ត្រូវបានព្យាករថា នឹងមានចំនួន ៧,៣សែនកោដិដុល្លារ នៅឆ្នាំ២០៣០»។

ការព្យាកររបស់ IMF សម្រាប់ឆ្នាំ២០២៦ បានធ្វើដាក់កម្រិតសេដ្ឋកិច្ចរបស់ប្រទេសឥណ្ឌាចំនួន ៤,៥១សែនកោដិដុល្លារ ធៀបនឹងជប៉ុន ដែលមាន ៤,៤៦សែនកោដិដុល្លារ។

ការវាយតម្លៃពីសន្ទុះវិជ្ជមានរបស់ទីក្រុងញូវដេលីនេះកើតឡើង បើទោះបីជាមានក្ដីបារម្ភផ្នែកសេដ្ឋកិច្ច បន្ទាប់ពីទីក្រុងវ៉ាស៊ីនតោន កាលពីខែសីហា បានដាក់អត្រាពន្ធខ្ពស់លើឥណ្ឌា ដោយសារការទិញប្រេងពីរុស្ស៊ី។ ប្រទេសឥណ្ឌាបានបញ្ជាក់ថា កំណើននេះកាន់តែឆ្លុះបញ្ចាំងពី «ភាពធន់របស់ខ្លួន ចំពេលមានភាពមិនប្រាកដប្រជានៃពាណិជ្ជកម្មសកល»៕