រដ្ឋមន្រ្តីក្រសួងមហាផ្ទៃទួរគីលោក Ali Yerlikaya និយាយថា នគរបាលទួរគី បានឃាត់ខ្លួនជនសង្ស័យ ៣៥៧នាក់ ក្នុងប្រតិបត្តិការនៅទូទាំងប្រទេសប្រឆាំងនឹងរដ្ឋអ៊ិស្លាមនាថ្ងៃអង្គារនេះ រយៈពេល ១ថ្ងៃ ក្រោយមន្រ្តីនគរបាល ៣នាក់ និងក្រុមជីវពល ៦នាក់ ត្រូវបានសម្លាប់ នៅក្នុងការផ្ទុះអាវុធនៅតំបន់ភាគពាយ័ព្យទួរគី ។

លោក Yerlikaya និយាយថា ក្រុមអាជ្ញាធរ បានបើកការវាយឆ្មក់តាមបណ្តាខេត្តចំនួន ២១នៅទូទាំងប្រទេស ។

មុននេះ ការិយាល័យរដ្ឋអាជ្ញាក្រុងអ៊ីស្តង់ប៊ុល បាននិយាយថា នគរបាលបានវាយឆ្មក់អាស័យដ្ឋាន ១១៤កន្លែង នៅក្នុងទីក្រុងអ៊ីស្តង់ប៊ុល និងបណ្តាខេត្ត ២ផ្សេងទៀត ហើយសម្ភារៈឌីជីថល និងឯកសារជាច្រើន ត្រូវបានរឹបអូស ។

គួរឲ្យដឹងថា នគរបាលបានប៉ះទង្គិចជាមួយក្រុមជីវពលកាលពីថ្ងៃចន្ទ នៅក្នុងការឡោមព័ទ្ធអស់រយៈពេល ៨ម៉ោង នៅចំណុចផ្ទះមួយខ្នងស្ថិតក្នុងទីក្រុង Yalova នៅតាមតំបន់ឆ្នេរសមុទ្រ Marmara ភាគខាងត្បូងទីក្រុងអ៊ីស្តង់ប៊ុល រយៈពេល ១សប្តាហ៍ ក្រោយសមាជិកសង្ស័យរដ្ឋអ៊ិស្លាមជាង ១០០នាក់ ត្រូវបានឃាត់ខ្លួន ពាក់ព័ន្ធនឹងផែនការចោទប្រកាន់ថា នឹងបើកការវាយប្រហារនៅថ្ងៃបុណ្យណូអែល និងថ្ងៃបុណ្យសកល ។

នគរបាល ៨នាក់ និងសមាជិកកងកម្លាំងសន្តិសុខម្នាក់ទៀត បានរងរបួសនៅក្នុងការវាយឆ្មក់កាលពីថ្ងៃចន្ទ ៕