វិមានក្រឹមឡាំងបាននិយាយកាលពីថ្ងៃអង្គារ៣០ធ្នូថាជំហររបស់ខ្លួននឹងកាន់តែតឹងរ៉ឹងជាងមុនក្នុងការចរចាបញ្ចប់សង្គ្រាមនៅអ៊ុយក្រែនបន្ទាប់ពីចោទប្រកាន់ទីក្រុងគីវពីការវាយប្រហារលើលំនៅដ្ឋានប្រធានាធិបតីរុស្ស៊ី ជាការចោទប្រកាន់មួយ ដែលទីក្រុងគីវនិយាយថាគ្មានមូលដ្ឋាន និងមានបំណងអូសបន្លាយជម្លោះ។  

អ៊ុយក្រែនបានលើកឡើងថាការចោទប្រកាន់របស់រុស្ស៊ីគឺជា ការកុហក ដែលមានគោលបំណងបង្ហាញពីភាពត្រឹមត្រូវនៃការវាយប្រហារបន្ថែមទៀតលើអ៊ុយក្រែន ហើយរដ្ឋមន្ត្រីការបរទេសរបស់ខ្លួនបាននិយាយកាលពីថ្ងៃអង្គារថារុស្ស៊ីពុំបានផ្តល់ភស្តុតាងណាមួយទេ ព្រោះគ្មានភស្តុតាង។

រុស្ស៊ី បាននិយាយកាលពីថ្ងៃចន្ទដើមសប្ដាហ៍នេះថា ទីក្រុងគីវបានវាយប្រហារលំនៅដ្ឋានប្រធានាធិបតីមួយនៅក្នុងតំបន់ Novgorod ដោយយានដ្រូនវាយប្រហារចម្ងាយឆ្ងាយចំនួន ៩១ គ្រឿង។វិមានក្រឹមឡាំង និយាយថាខ្លួននឹងសងសឹក និងពិនិត្យឡើងវិញនូវជំហរចរចារបស់ខ្លួន ប៉ុន្តែនឹងមិនបោះបង់ចោលការចរចាលើកិច្ចព្រមព្រៀងសន្តិភាពដែលអាចធ្វើទៅបាននោះទេ។

អ្នកនាំពាក្យវិមានក្រឹមឡាំងលោក Dmitry Peskov បានប្រាប់ក្រុមអ្នកសារព័ត៌មានកាលពីថ្ងៃអង្គារថា សកម្មភាពភេរវកម្មនេះមានគោលបំណងបំផ្លាញដំណើរការចរចា។ ផលវិបាកការទូតនឹងធ្វើឱ្យជំហរចរចារបស់សហព័ន្ធរុស្ស៊ីកាន់តែតឹងរ៉ឹង។

ជំហរចរចាដ៏តឹងរ៉ឹងនឹងធ្វើឱ្យស្មុគស្មាញដល់កិច្ចខិតខំប្រឹងប្រែងដែលដឹកនាំដោយប្រធានាធិបតីអាមេរិកលោក Donald Trump ដើម្បីបញ្ចប់សង្គ្រាមដ៏សាហាវបំផុតនៅអឺរ៉ុបចាប់តាំងពីសង្គ្រាមលោកលើកទី២៕