អេមីរ៉ាតអារ៉ាប់រួម កាលពីថ្ងៃអង្គារ (៣០ ធ្នូ) បានប្រកាសពីការដកកងកម្លាំងរបស់ខ្លួនចេញពីប្រទេសយេម៉ែន បន្ទាប់ពីការវាយប្រហារតាមអាកាសរបស់អារ៉ាប៊ីសាអ៊ូឌីត ក្នុងជំហានមួយដែលអាចជួយបន្ថយការប្រឈមមុខដាក់គ្នារវាងអារ៉ាប់រួម និងអារ៉ាប៊ីសាអ៊ូឌីត ប៉ុន្តែចំណុចនេះក៏បានបង្ហាញឱ្យឃើញពីកំណើនភាពមិនទុកចិត្តគ្នាយ៉ាងខ្លាំងរវាងមហាអំណាចប្រេងឈូងសមុទ្រទាំងពីរ ដែលមានការខ្វែងគំនិតជាយូរមកហើយ នេះបើតាមអត្ថបទបែបវិភាគរបស់សារព័ត៌មានរ៉យទ័រ។

ការវាយប្រហារតាមអាកាសដោយក្រុមចម្រុះ ដឹកនាំដោយអារ៉ាប៊ីសាអ៊ូឌីត កាលពីព្រឹកថ្ងៃអង្គារ លើកំពង់ផែ Mukalla ភាគខាងត្បូងយេម៉ែន ត្រូវបានបន្តពីក្រោយ ដោយការអំពាវនាវឱ្យកងកម្លាំងអារ៉ាប់រួមទាំងអស់ ចាកចេញពីយេម៉ែន និងសេចក្តីថ្លែងការណ៍មួយពីទីក្រុងរីយ៉ាដ ដែលនិយាយថា សន្តិសុខជាតិរបស់ខ្លួនគឺជាបន្ទាត់ក្រហម។

អារ៉ាប់រួម និយាយថា ខ្លួនភ្ញាក់ផ្អើលខ្លាំងចំពោះការវាយប្រហារនេះ ប៉ុន្តែមិនយូរប៉ុន្មានក៏បានប្រកាសថា ខ្លួនកំពុងដកកងកម្លាំងនៅសេសសល់ ចេញពីយេម៉ែន ដើម្បីសុវត្ថិភាពរបស់ពួកគេ។

វិបត្តិនេះ — ដែលបង្កឡើងដោយការរុលទៅមុខពីពួកផ្ដាច់ខ្លួនគាំទ្រដោយអារ៉ាប់រួម ឆ្លងកាត់ភាគខាងត្បូងប្រទេសយេម៉ែន កាលពីដើមខែធ្នូ — បានទម្លាយឱ្យឃើញនូវការបែកបាក់ជាច្រើនឆ្នាំរវាងមហាអំណាចឈូងសមុទ្រទាំងពីរ លើរឿងរ៉ាវស្ទើរតែគ្រប់យ៉ាង រាប់ចាប់ពីកូតាប្រេង រហូតដល់ឥទ្ធិពលភូមិសាស្ត្រនយោបាយ។ ការប៉ះទង្គិចគ្នាណាមួយបន្ថែមទៀតរវាងអារ៉ាប៊ីសាអ៊ូឌីត និងអារ៉ាប់រួម នឹងបង្កផលអាក្រក់ផ្នែកហិរញ្ញវត្ថុដល់ឈូងសមុទ្រដ៏មានឥទ្ធិពល ដែលមានមោទនភាពចំពោះខ្លួនឯង ថាជាដែនកោះដ៏ស្ថិរភាព នៅក្នុងទឹកដីតំបន់មជ្ឈិមបូព៌ាដ៏ចលាចល៕