នគរបាលអាល្លឺម៉ង់ បាននិយាយកាលពីថ្ងៃអង្គារ (៣០ ធ្នូ) ថា ចោរមួយក្រុម បានប្រើម៉ាស៊ីនខួងធុនធំ ដើម្បីខួងទម្លាយចូលទៅក្នុងបន្ទប់សុវត្ថិភាពរបស់ធនាគារដាក់ប្រាក់សន្សំមួយកន្លែងក្នុងប្រទេសអាល្លឺម៉ង់ ហើយលួចយកសាច់ប្រាក់សុទ្ធ មាស និងគ្រឿងអលង្ការ ដែលមានតម្លៃប្រហែល ៣០លានអឺរ៉ូ (ប្រមាណ ៣៥ លានដុល្លារអាមេរិក)។

ខណៈដែលឧក្រិដ្ឋជននៅតែមិនទាន់ចាប់ខ្លួនបាន អតិថិជនធនាគាររាប់រយនាក់ កំពុងព្រួយបារម្ភហើយបានប្រមូលផ្តុំគ្នានៅខាងក្រៅសាខាធនាគារនៅថ្ងៃអង្គារដដែលនោះ ដើម្បីទាមទារព័ត៌មានលម្អិត ប៉ុន្តែត្រូវបានអាជ្ញាធររារាំង។ យោងតាមនគរបាលបានឱ្យដឹងថា ក្រុមចោរបានខួងជញ្ជាំងបេតុងយ៉ាងក្រាស់ចេញពីចំណតរថយន្ត ទម្លុះចូលទៅក្នុងឃ្លាំងសុវត្ថិភាពនៃធនាគារដាក់ប្រាក់សន្សំឈ្មោះ Sparkasse នៅភាគខាងលិចទីក្រុង Gelsenkirchen។

ក្រុមអ្នកស៊ើបអង្កេតសង្ស័យថា ឧក្រិដ្ឋជនទាំងនោះបានចំណាយពេលភាគច្រើននៃចុងសប្តាហ៍ នៅខាងក្នុងឃ្លាំងសុវត្ថិភាព ដើម្បីទម្លាយប្រអប់ដាក់ប្រាក់។ ចោរកម្មនេះត្រូវបានគេដឹង បន្ទាប់ពីសំឡេងកណ្ដឹងរោទិ៍អគ្គិភ័យបន្លឺឡើងនៅព្រឹកព្រលឹមថ្ងៃចន្ទ ហើយសេវាសង្គ្រោះបន្ទាន់បានរកឃើញរន្ធដ៏ធំដែលចោរបានខួង។

សាក្សីរាយការណ៍ថា ពួកគេបានឃើញបុរសជាច្រើននាក់ កាន់កាបូបធំៗនៅក្នុងជណ្តើរនៃចំណតរថយន្ត អំឡុងពេលយប់ចាប់ពីថ្ងៃសៅរ៍ ដល់ថ្ងៃអាទិត្យ ចុងសប្ដាហ៍កន្លងទៅ។ នគរបាលនិយាយថា ប្រអប់ជាង ៣.០០០ប្រអប់ដែលត្រូវបានលួច មានតម្លៃធានារ៉ាប់រងជាមធ្យម ១០.០០០អឺរ៉ូក្នុងមួយប្រអប់ ហើយដូច្នេះបានប៉ាន់ប្រមាណថា ការខូចខាតមានប្រហែល ៣០លានអឺរ៉ូ៕