ប្រជាកសិករប៉ូឡូញ បានប្រមូលផ្ដុំគ្នាធ្វើបាតុកម្ម កាលពីថ្ងៃអង្គារ (៣០ ធ្នូ) នៅទីតាំងជាង ១៦០កន្លែងទូទាំងប្រទេស ដោយតវ៉ាប្រឆាំងនឹងផែនការកិច្ចព្រមព្រៀងពាណិជ្ជកម្ម រវាងប្លុកអឺរ៉ុប និងប្លុកអាមេរិកខាងត្បូង ឬត្រូវគេស្គាល់ថា កិច្ចព្រមព្រៀងទីផ្សាររួមអាមេរិកឡាទីន (Mercosur) ដែលពួកកសិករបាននិយាយថា គំរាមកំហែងដល់វិស័យកសិកម្មប៉ូឡូញ សហគមន៍ជនបទ និងសន្តិសុខស្បៀងជាតិ។

អ្នករៀបចំការតវ៉ាអះអាងថា កិច្ចព្រមព្រៀងនេះនឹងបើកទីផ្សារសហភាពអឺរ៉ុប ដល់ផលិតផលកសិកម្មពីអាមេរិកខាងត្បូង ដែលផលិតក្រោមស្តង់ដារបរិស្ថាន និងបទប្បញ្ញត្តិទាប ដែលធ្វើឱ្យកសិករប៉ូឡូញខាតបង់តម្លៃ និងពន្លឿនការធ្លាក់ចុះនៃកសិដ្ឋានតាមបែបគ្រួសារ។

សកម្មភាពបាតុកម្ម ដែលរៀបចំឡើងដោយក្រុមតវ៉ាកសិករថ្នាក់ជាតិ ត្រូវបានធ្វើឡើងលើដងផ្លូវហាយវេ ផ្លូវល្បឿនលឿន ផ្លូវជាតិ និងចំណុចដឹកជញ្ជូនសំខាន់ៗ។ ការរំខានចរាចរណ៍ត្រូវបានរាយការណ៍នៅកណ្តាលប៉ូឡូញ តំបន់ Pomerania តំបន់ Lodz និង Opole និងនៅរដ្ឋធានីវ៉ាសូវី ខណៈបាតុកម្មបន្ថែមក៏បានផ្ទុះឡើងនៅទីក្រុងផ្សេងទៀតជាបន្តបន្ទាប់ផងដែរ។

គួរឱ្យដឹងថា កិច្ចព្រមព្រៀងទីផ្សាររួមនេះ នឹងផ្តល់ពន្ធអនុគ្រោះសម្រាប់ការនាំចូលសាច់គោ សាច់បក្សី ផលិតផលទឹកដោះគោ ស្ករ និងសារធាតុអេតាណុល មកពីប្រេស៊ីល អាហ្សង់ទីន ប៉ារ៉ាហ្គាយ អ៊ុយរូហ្គាយ និងបូលីវី ខណៈដែលទំនិញឧស្សាហកម្មអឺរ៉ុប នឹងទទួលបានសិទ្ធិកាន់តែទូលំទូលាយចូលទៅទីផ្សារអាមេរិកខាងត្បូង៕