រដ្ឋមន្ត្រីការបរទេសចិន លោក Wang Yi បានរិះគន់ការលក់អាវុធរបស់សហរដ្ឋអាមេរិកទៅឱ្យតៃវ៉ាន់ក្នុងចំនួនខ្ពស់បំផុត កាលពីថ្ងៃអង្គារ៣០ធ្នូសប្ដាហ៍នេះ ខណៈប្រទេសរបស់លោក ធ្វើសមយុទ្ធយោធានៅជុំវិញកោះនេះ។

រដ្ឋបាលលោក Trump កាលពីថ្ងៃទី១៧ ខែធ្នូ បានប្រកាសលក់អាវុធដែលមានតម្លៃជាង១១ ពាន់លានដុល្លារទៅឱ្យកោះតៃវ៉ាន់ ដែលក្រសួងការបរទេសសហរដ្ឋអាមេរិកបានអនុម័ត។ 

លោក Wang បានថ្លែងនៅក្នុងព្រឹត្តិការណ៍ការទូតមួយនៅទីក្រុងប៉េកាំងថា ដើម្បីឆ្លើយតបទៅនឹងការញុះញង់ជាបន្តបន្ទាប់ដោយកងកម្លាំងគាំទ្រឯករាជ្យនៅតំបន់តៃវ៉ាន់ និងការលក់អាវុធទ្រង់ទ្រាយធំរបស់សហរដ្ឋអាមេរិកទៅឱ្យតៃវ៉ាន់ យើងត្រូវតែប្រឆាំងយ៉ាងដាច់អហង្ការ និងតបតវិញយ៉ាងខ្លាំង។ 

លោក Wang ក៏បានរិះគន់ផងដែរលើ នាយករដ្ឋមន្ត្រីជប៉ុនលោកស្រី Sanae Takaichi ចំពោះការប្រឈមនឹងអធិបតេយ្យភាពទឹកដីរបស់ប្រទេសចិន បន្ទាប់ពីលោកស្រីបាននិយាយកាលពីខែមុនថា ការបិទផ្លូវកងទ័ពជើងទឹកចិន ឬការកើនឡើងផ្សេងទៀតប្រឆាំងនឹងកោះតៃវ៉ាន់ អាចជាមូលដ្ឋានសម្រាប់ការឆ្លើយតបពីប្រទេសរបស់លោកស្រី៕