អង្គការសហប្រជាជាតិបានព្រមានកាលពីថ្ងៃអង្គារ ទី៣០ ខែធ្នូ ថា ចំណាត់ការថ្មីៗរបស់អ៊ីស្រាអែលប្រឆាំងទីភ្នាក់ងារអង្គការសហប្រជាជាតិសម្រាប់ជនភៀសខ្លួនប៉ាឡេស្ទីនដែលបានប្រឈមនឹងការដកចេញសេវាជាមូលដ្ឋានរបស់មនុស្សរាប់លាននាក់ ដូចជាការសិក្សាអប់រំ និងការថែទាំសុខភាព។

សភាអ៊ីស្រាអែល បានអនុម័តច្បាប់ថ្មីកាលពីថ្ងៃចន្ទជាផ្លូវការ ដោយដកអភ័យឯកសិទ្ធិផ្នែកការទូតរបស់ទីភ្នាក់ងារជំនួយនិងការងាររបស់អង្គការសហប្រជាជាតិ (UNRWA) និងហាមឃាត់ក្រុមហ៊ុនអ៊ីស្រាអែលពីការផ្គត់ផ្គង់ទឹក ឬអគ្គិសនីដល់ស្ថាប័នរបស់ទីភ្នាក់ងារនេះ។

យោងតាមទីភ្នាក់ងារ UNRWA ច្បាប់នេះក៏ផ្តល់សិទ្ធិអំណាចដល់រដ្ឋាភិបាលអ៊ីស្រាអែលក្នុងការរឹបអូសទ្រព្យសម្បត្តិរបស់ទីភ្នាក់ងារនៅភាគខាងកើតទីក្រុងយេរុយសាឡឹម រួមទាំងទីស្នាក់ការកណ្តាល និងមជ្ឈមណ្ឌលបណ្តុះបណ្តាលវិជ្ជាជីវៈដ៏សំខាន់របស់ទីភ្នាក់ងារ។

លោក Philippe Lazzarini ប្រធានទីភ្នាក់ងារ UNRWA បានថ្កោលទោសច្បាប់នេះថា «ហួសហេតុ» ដោយរិះគន់នៅលើណ្តាញផ្សព្វផ្សាយសង្គមថាជា «ផ្នែកមួយនៃយុទ្ធនាការដែលកំពុងបន្តនិងជាប្រព័ន្ធដើម្បីបង្ខូចកេរ្តិ៍ឈ្មោះទីភ្នាក់ងារ UNRWA និងរារាំងតួនាទីស្នូលដែលទីភ្នាក់ងារនេះមានក្នុងការផ្តល់ជំនួយអភិវឌ្ឍន៍មនុស្ស និងសេវានានាដល់ជនភៀសខ្លួនប៉ាឡេស្ទីន»។

នៅក្នុងបទសម្ភាសន៍មួយ លោកបានបញ្ជាក់ថា ទីភ្នាក់ងារ UNRWA មិនដូចទីភ្នាក់ងារអង្គការសហប្រជាជាតិផ្សេងទៀតទេ បានផ្តល់សេវាសាធារណៈជាមូលដ្ឋានដូចជាការអប់រំ និងការថែទាំសុខភាពដល់ជនភៀសខ្លួនប៉ាឡេស្ទីនរាប់លាននាក់ដែលបានចុះឈ្មោះ ខណៈខ្លួនបម្រើនៅទូទាំងតំបន់ហ្កាហ្សា និងតំបន់ West Bank ព្រមទាំងនៅក្នុងប្រទេសលីបង់ ហ្ស៊កដានី និងប្រទេសស៊ីរី។