បញ្ជាការកណ្តាលរបស់សហរដ្ឋអាមេរិក (CENTCOM) បាននិយាយកាលពីថ្ងៃអង្គារ (៣០ ធ្នូ) ថា ប្រតិបត្តិការរួមគ្នារវាងកងកម្លាំងអាមេរិក និងដៃគូ បានសម្លាប់ក្រុមភេរវករ ដាអេស (Daesh) យ៉ាងតិច ៧នាក់ និងចាប់ខ្លួន ១៨នាក់ផ្សេងទៀត ក្នុងអំឡុងប្រតិបត្តិការជាបន្តបន្ទាប់ ទូទាំងប្រទេសស៊ីរី កាលពីចុងខែវិច្ឆិកា។

ការវាយឆ្មក់ទាំងនេះ បានកើតឡើងបន្ទាប់ពីការបើកប្រតិបត្តិការយោធាផ្លូវអាកាស Hawkeye Strike នៅថ្ងៃទី១៩ ខែធ្នូ ដែលជាការវាយលុកទ្រង់ទ្រាយធំរវាងសហរដ្ឋអាមេរិក និងហ្ស៊កដានី ដោយកំណត់គោលដៅលើហេដ្ឋារចនាសម្ព័ន្ធរបស់ក្រុមរដ្ឋអ៊ិស្លាម (ISIS) បន្ទាប់ពីការវាយប្រហារលើកងកម្លាំងអាមេរិក កាលពីដើមខែនេះ។

បញ្ជាការ CENTCOM បាននិយាយក្នុងសេចក្តីថ្លែងការណ៍មួយលើបណ្ដាញសង្គម X ថា៖ «កងកម្លាំង អាមេរិក និងដៃគូ បានសម្លាប់ឬចាប់ខ្លួនក្រុម ISIS (ឬហៅថាពួក Daesh) ប្រហែល ២៥នាក់ ក្នុងពេលប៉ុន្មានថ្ងៃ បន្ទាប់ពីការវាយប្រហារទ្រង់ទ្រាយធំថ្ងៃទី១៩ ខែធ្នូ នៅស៊ីរី»។ បញ្ជាការបន្តថា ក្នុងពេលជាង ១០ថ្ងៃ កងទ័ពអាមេរិក និងសម្ព័ន្ធមិត្ត បានអនុវត្តបេសកកម្ម ១១លើក រវាងថ្ងៃទី២០ និងទី២៩ ខែធ្នូ។

ប្រតិបត្តិការទាំងនេះត្រូវបានធ្វើឡើង ដើម្បីសងសឹកចំពោះការវាយប្រហាររបស់ក្រុម ISIS កាលពីថ្ងៃទី១៣ ខែធ្នូ លើក្រុមល្បាតរបស់សហរដ្ឋអាមេរិក នៅកណ្តាលប្រទេសស៊ីរី ដែលបានសម្លាប់ទាហានអាមេរិកពីរនាក់ និងជនស៊ីវិលម្នាក់៕