ក្រុមអ្នកតវ៉ាបានចេញធ្វើបាតុកម្មនៅតាមដងផ្លូវកាលពីថ្ងៃអង្គារ ទី៣០ ខែធ្នូ ក្នុងការគាំទ្រក្រុមប្រឹក្សាអន្តរកាលភាគខាងត្បូង(STC)នៃក្រុមផ្តាច់ខ្លួននៅយេម៉ែន ដើម្បីតវ៉ាប្រឆាំងការអំពាវនាវរបស់លោក Rashad al-Alimi ប្រធានក្រុមប្រឹក្សាប្រធានាធិបតីយេម៉ែនគាំទ្រដោយប្រទេសអារ៉ាប៊ីសាអ៊ូឌីត សម្រាប់កងកម្លាំងរបស់ប្រទេសអារ៉ាប់រួមឲ្យចាកចេញពីប្រទេសក្នុងរយៈពេល២៤ម៉ោង។

ប្រទេសអារ៉ាប់រួម បាននិយាយកាលពីថ្ងៃអង្គារថា ខ្លួនកំពុងដកកងកម្លាំងដែលនៅសល់របស់ខ្លួននៅក្នុងប្រទេសយេម៉ែន ក្នុងវិបត្តិដ៏ធំមួយរវាងប្រទេសមហាអំណាចឈូងសមុទ្រទាំងពីរ និងជាប្រទេសផលិតប្រេង។ ប្រទេសអារ៉ាប់រួមបានធ្វើការប្រកាស ប៉ុន្មានម៉ោងបន្ទាប់ពីការវាយប្រហារតាមអាកាសរបស់ក្រុមចម្រុះដឹកនាំដោយប្រទេសអារ៉ាប៊ីសាអ៊ូឌីតលើកំពង់ផែ Mukalla ភាគខាងត្បូងប្រទេសយេម៉ែន។

ការវាយប្រហារលើអ្វីដែលទីក្រុងរីយ៉ាដ បាននិយាយថាជាការដឹកជញ្ជូនអាវុធដែលមានទំនាក់ទំនងជាមួយប្រទេសអារ៉ាប់រួម បានសម្គាល់ពីការកើនឡើងខ្លាំងបំផុតរវាងប្រទេសអារ៉ាប៊ីសាអ៊ូឌីត និងអារ៉ាប់រួម រហូតមកដល់ពេលបច្ចុប្បន្ននេះក្នុងការបែកបាក់កាន់តែធំរវាងប្រទេសឈូងសមុទ្រទាំងពីរ។

ក្រសួងការពារជាតិអារ៉ាប់រួម បាននិយាយថា បេសកកម្មរបស់អង្គភាពប្រឆាំងភេរវកម្មបានបញ្ចប់នៅក្នុងប្រទេសយេម៉ែនដោយស្ម័គ្រចិត្ត ជាកងកម្លាំងនៅសេសសល់ដែលខ្លួនមាននៅក្នុងប្រទេសនេះ បន្ទាប់ពីវត្តមានយោធារបស់ខ្លួននៅក្នុងប្រទេសយេម៉ែន «បានបញ្ចប់» ក្នុងឆ្នាំ២០១៩។