ប្រព័ន្ធផ្សព្វផ្សាយរដ្ឋ បានរាយការណ៍ថា លោកប្រធានាធិបតីចិន Xi Jinping បានថ្លែងនាថ្ងៃពុធ (៣១ ធ្នូ) នេះថា ប្រទេសចិន នឹងអនុវត្តគោលនយោបាយម៉ាក្រូសេដ្ឋកិច្ចកាន់តែបុរេសកម្មជាងមុន នៅឆ្នាំ២០២៦ ដ៏ខ្លីខាងមុខ ដែលមានគោលបំណងគាំទ្រដល់កំណើនរយៈពេលវែង ដោយសេដ្ឋកិច្ចរបស់ចិន ត្រូវបានរំពឹងថា នឹងសម្រេចគោលដៅកំណើនរបស់ទីក្រុងប៉េកាំង ប្រហែល ៥% នៅឆ្នាំ២០២៥ នេះ។

ក្នុងសុន្ទរកថារបស់លោកនៅពិធីជប់លៀងទឹកតែឆ្នាំថ្មី របស់ក្រុមមន្ត្រីជាន់ខ្ពស់បក្សកុម្មុយនិស្តចិន លោក Xi បានថ្លែងថា ក្នុងឆ្នាំ២០២៥នេះ សេដ្ឋកិច្ចត្រូវបានរំពឹងថា នឹងកើនឡើងដល់ប្រហែល ១៤០ សែនកោដិយ័ន (ប្រមាណ ២០សែនកោដិដុល្លារអាមេរិក) នេះបើយោងតាមការចុះផ្សាយរបស់ទូរទស្សន៍រដ្ឋ CCTV។

នៅក្នុងសុន្ទរកថានោះ លោក Xi បានលើកឡើងថា «សេដ្ឋកិច្ចរបស់ប្រទេសចិន ត្រូវបានរំពឹងថានឹងរីកចម្រើនទៅមុខនៅក្រោមសម្ពាធ... ដែលបង្ហាញពីភាពធន់ និងភាពរស់រវើកយ៉ាងខ្លាំង»។ លោកបន្តថា ចិននឹងលើកកម្ពស់ការកែលម្អគុណភាពប្រកបដោយប្រសិទ្ធភាព និងកំណើនបរិមាណសមហេតុផលនៅក្នុងសេដ្ឋកិច្ច ខណៈរក្សាបាននូវភាពសុខដុមនីយកម្ម និងស្ថិរភាពសង្គម។

សាររបស់លោក Xi បានបញ្ជាក់ជាថ្មីនូវការសន្យារបស់រដ្ឋាភិបាលចិន នាពេលថ្មីៗនេះ ក្នុងការដាក់ចេញវិធានការសម្រាប់ជំរុញប្រាក់ចំណូលរបស់ប្រជាជន និងគាំទ្រដល់ការប្រើប្រាស់ និងការវិនិយោគ ដើម្បីជំរុញកំណើន៕