ក្រុមមន្ត្រីបាននិយាយនៅថ្ងៃពុធ (៣១ ធ្នូ) នេះថា អាជ្ញាធរឥណ្ឌូនេស៊ី បានដំឡើងកម្រិតប្រកាសអាសន្នសម្រាប់ភ្នំភ្លើង Bur Ni Telong ក្នុងខេត្ត Aceh ចុងបស្ចិមរបស់ប្រទេសនេះ ឱ្យឡើងដល់កម្រិតខ្ពស់បំផុតទីពីរ បន្ទាប់ពីមានសកម្មភាពកម្រើកកើនឡើងជាបន្តបន្ទាប់ និងសកម្មភាពរញ្ជួយភ្នំភ្លើង។

លោកស្រី Lana Saria ប្រធានស្តីទីនៃទីភ្នាក់ងារភូគព្ភសាស្ត្រ នៅក្រសួងថាមពលនិងធនធានរ៉ែឥណ្ឌូនេស៊ី បាននិយាយថា ភ្នំភ្លើងដែលមានកម្ពស់ ២.៦២៤ម៉ែត្រ ក្នុងតំបន់ Bener Meriah ខេត្ត Aceh នោះ បានកត់ត្រាសកម្មភាពរញ្ជួយយ៉ាងតិច ៧ដង កាលពីល្ងាចថ្ងៃអង្គារ ដែលបង្កជាអារម្មណ៍រង្គើចម្ងាយប្រហែល ៥គីឡូម៉ែត្រ ខណៈឧបករណ៍វាស់ស្ទង់ក៏បានរកឃើញកម្រិតរញ្ជួយផ្សេងៗទៀតដែរ។

វីដេអូតាមដានរបស់ទីភ្នាក់ងារភូគព្ភសាស្ត្រ បង្ហាញឱ្យឃើញភ្នំនោះយ៉ាងច្បាស់ ដោយគ្មានផ្សែងក្នុងរណ្ដៅភ្នំភ្លើងឡើយ ប៉ុន្តែទោះយ៉ាងនេះក្ដី លោកស្រី Lana បានព្រមានពីការផ្ទុះដែលអាចកើតមាន។ អាជ្ញាធរជំរុញឱ្យពលរដ្ឋ និងអ្នកទេសចរ នៅចម្ងាយយ៉ាងតិច ៤ គីឡូម៉ែត្រ ពីរណ្ដៅភ្នំភ្លើង ហើយជៀសវាងតំបន់មួយចំនួន អំឡុងមានពពកក្រាស់ឬភ្លៀងធ្លាក់ ព្រោះកំហាប់ឧស្ម័នអាចគំរាមកំហែងអាយុជីវិត។

ប្រទេសឥណ្ឌូនេស៊ី ជាកោះប្រជុំដែលមានប្រជាជនជាង ២៨០លាននាក់ មានភ្នំភ្លើងសកម្មជាង ១២០ ហើយប្រទេសនេះងាយនឹងកើតសកម្មភាពបន្ទុះភ្នំភ្លើងណាស់ ព្រោះសណ្ឋានដីរបស់ខ្លួនស្ថិតនៅតាមបណ្តោយតំបន់ «កងភ្លើង» ប៉ាស៊ីហ្វិក៕