ឆ្មាំល្បាតឆ្នេរកោះតៃវ៉ាន់ បាននិយាយថា កោះនេះនៅតែស្ថិតក្នុងការប្រុងប្រយ័ត្នខ្ពស់បំផុតនៅថ្ងៃពុធ (៣១ ធ្នូ) នេះ បន្ទាប់ពីប្រទេសចិន បានបើកសមយុទ្ធយោធាទ្រង់ទ្រាយធំនៅជុំវិញកោះ កាលពីអង្គារ ដោយរក្សាមជ្ឈមណ្ឌលឆ្លើយតបបន្ទាន់តាមសមុទ្ររបស់ខ្លួនឱ្យដំណើរការ ខណៈកំពុងតាមដានសមយុទ្ធកងទ័ពជើងទឹកចិន។

ហ្គេមសង្រ្គាមរបស់ទីក្រុងប៉េកាំង ដែលមានឈ្មោះថា "បេសកកម្មយុត្តិធម៌ ២០២៥" បានមើលឃើញប្រទេសចិន បាញ់រ៉ូកែតរាប់សិបគ្រាប់ឆ្ពោះទៅកាន់ដែនទឹកកោះតៃវ៉ាន់ និងដាក់ពង្រាយនាវាចម្បាំង និងយន្តហោះមួយចំនួនធំនៅជិតកោះនេះ ដែលជាការបង្ហាញកម្លាំងដ៏មហិមា។

មន្រ្តីកោះតៃវ៉ាន់ និយាយថា នាវាចិន កំពុងចាកចេញពីតំបន់នេះហើយ ប៉ុន្តែទីក្រុងប៉េកាំង មិនទាន់ប្រកាសជាផ្លូវការពីការបញ្ចប់សមយុទ្ធនៅឡើយទេ។ មន្ត្រីតៃវ៉ាន់ម្នាក់បានប្រាប់សារព័ត៌មានរ៉យទ័រថា នាវាឆ្មាំល្បាតឆ្នេរប្រទេសចិនទាំង ១១គ្រឿង បានចាកចេញពីដែនទឹកក្បែរកោះ ហើយកំពុងបន្តធ្វើដំណើរចេញបន្ថែមទៀត។ មន្ត្រីសន្តិសុខតៃវ៉ាន់ម្នាក់និយាយថា មជ្ឈមណ្ឌលឆ្លើយតបបន្ទាន់សម្រាប់យោធា និងឆ្មាំល្បាតឆ្នេររបស់កោះ នៅតែសកម្ម។

ការហ្វឹកហ្វឺននេះ ដែលជាសមយុទ្ធសង្គ្រាមដ៏ទូលំទូលាយបំផុតរបស់ចិនរហូតមកដល់បច្ចុប្បន្ន គិតតាមតំបន់គ្របដណ្តប់ បានបង្ខំឱ្យកោះតៃវ៉ាន់ លុបចោលជើងហោះហើរក្នុងស្រុករាប់សិបជើង និងបញ្ជូនកម្លាំងដើម្បីត្រួតពិនិត្យ។ អ្នកនាំពាក្យការិយាល័យកិច្ចការតៃវ៉ាន់ របស់ប្រទេសចិន លោកស្រី Zhang Han បានប្រាប់អ្នកយកព័ត៌មាននៅថ្ងៃពុធនេះថា ប្រទេសចិន បានចាត់ទុកសមយុទ្ធនេះថាជា «វិធានការចាំបាច់ និងយុត្តិធម៌» ដើម្បីការពារអធិបតេយ្យភាពជាតិ និងបូរណភាពទឹកដីរបស់ខ្លួន៕