ឆ្មាំល្បាតឆ្នេរហ្វីលីពីន បានឲ្យដឹងថា ខ្លួនបានដាក់ពង្រាយយន្តហោះ កាលពីថ្ងៃអង្គារ (ទី៣០ ខែធ្នូ) ដើម្បីបញ្ចេញសំឡេងសួរព្រមានទៅកាន់នាវាស្រាវជ្រាវរបស់ចិន ដែលបម្រើជាមូលដ្ឋានសម្រាប់នាវាមុជទឹក បន្ទាប់ពីត្រូវបានប្រទះឃើញប្រហែល ១៩ម៉ាយល៍ណត់ (៣៥គីឡូម៉ែត្រ) ពីឆ្នេរសមុទ្រនៃខេត្ត Cagayan ភាគខាងជើង។

ឆ្មាំល្បាតឆ្នេរហ្វីលីពីន (PCG) បានឲ្យដឹងនៅក្នុងសេចក្តីថ្លែងការណ៍មួយថា អ្នកបើកយន្តហោះ បានចេញសំឡេងសញ្ញាសួរព្រមានតាមវិទ្យុទាក់ទងជាច្រើនដងទៅកាន់នាវាស្រាវជ្រាវចិន Tan Suo Er Hao ដោយស្វែងរកការបញ្ជាក់អះអាងថា តើនាវានេះកំពុងធ្វើការស្រាវជ្រាវនៅសមុទ្រដោយគ្មានការយល់ព្រមពីទីក្រុងម៉ានីលដែរ ឬទេ ជាសកម្មភាពដែលនឹងបំពានច្បាប់ហ្វីលីពីន និងច្បាប់អន្តរជាតិ ប៉ុន្តែមិនបានទទួលការឆ្លើយតបឡើយ។

PCG បានបន្តថា នាវាស្រាវជ្រាវទឹកជ្រៅប្រវែង ៨៧,២៥ម៉ែត្រ ដែលបានចាកចេញពីខេត្ត Hainan របស់ចិន កាលពីដើមខែធ្នូ ហើយបានចូលទៅក្នុងផ្នែកខាងលិចនៃតំបន់សេដ្ឋកិច្ចផ្តាច់មុខរបស់ប្រទេសហ្វីលីពីន បន្ទាប់មកត្រូវបានតាមដានពិនិត្យ ដោយធ្វើដំណើរតម្រង់ឆ្ពោះទៅទិសខាងកើត ចម្ងាយប្រហែល ៥៥,៨ម៉ាយល៍ណត់ ពីទីក្រុង Santa Ana របស់ខេត្ត Cagayan។

Cagayan ដែលជាខេត្តភាគខាងជើងបំផុតនៃកោះ Luzon ក្បែរកោះតៃវ៉ាន់ គឺមូលដ្ឋានយោធាមួយ ក្នុងចំណោមមូលដ្ឋានទ័ពចំនួន ៩ ដែលកងកម្លាំងអាមេរិកអាចចូលទៅប្រើប្រាស់បាន ក្រោមកិច្ចព្រមព្រៀងលើកកម្ពស់កិច្ចសហប្រតិបត្តិការការពារជាតិ (EDCA)។

កាលពីថ្ងៃទី៣០ ខែធ្នូ ចិនបានធ្វើសមយុទ្ធ ជុំវិញកោះតៃវ៉ាន់ ដោយបាញ់គ្រាប់រ៉ូកែតចូលទៅក្នុងដែនទឹក នៅជុំវិញ និងធ្វើការវាយប្រហារដូចការពិត និងបិទខ្ទប់ ជាសមយុទ្ធដែលមានឈ្មោះថា «Justice Mission 2025» (បេសកកម្មយុត្តិធម៌ឆ្នាំ២០២៥) ដែលបានចាប់ផ្តើមឡើងក្រោយប៉ុន្មានថ្ងៃបន្ទាប់ពីទីក្រុងវ៉ាស៊ីនតោន បានប្រកាសកញ្ចប់លក់អាវុធចំនួន ១១,១ពាន់លានដុល្លារអាមេរិក សម្រាប់ទីក្រុងតៃប៉ិ៕