ចក្រភពអង់គ្លេស កាលពីថ្ងៃអង្គារ (ទី៣០ ខែធ្នូ) បានប្រាប់ឲ្យដឹងថា សមយុទ្ធយោធារបស់ចិន នៅជុំវិញកោះតៃវ៉ាន់ បានបង្កើនហានិភ័យឲ្យកើនឡើងភាពតានតឹង ហើយបានលើកឡើងជាថ្មីនូវការអំពាវនាវឲ្យមានការអត់ធ្មត់។

អ្នកនាំពាក្យក្រសួងការបរទេស បានបញ្ជាក់នៅក្នុងសេចក្តីថ្លែងការណ៍មួយថា៖ «សមយុទ្ធយោធារបស់ចិននៅជុំវិញកោះតៃវ៉ាន់ នាសប្តាហ៍នេះ ធ្វើឲ្យភាពតានតឹងកើនឡើងកាន់តែខ្លាំង នៅទូទាំងច្រកសមុទ្រ និងហានិភ័យនាំឲ្យមានជម្លោះកាន់តែក្ដៅគគុក»។

សេចក្តីថ្លែងការណ៍នោះបានបន្ថែមថា៖ «យើងយល់ថា បញ្ហាកោះតៃវ៉ាន់ គឺបញ្ហាមួយ ដែលត្រូវតែត្រូវបានដោះស្រាយដោយសន្តិវិធីដោយប្រជាជនភាគីទាំង២ នៃច្រកសមុទ្រតៃវ៉ាន់ តាមរយៈការសន្ទនា ក្នុងន័យស្ថាបនា ដោយគ្មានការគំរាមកំហែង ឬការប្រើប្រាស់កម្លាំង ឬការបង្ខិតបង្ខំ។ យើងមិនគាំទ្រការប៉ុនប៉ងជាឯកតោភាគីណាមួយ ដើម្បីផ្លាស់ប្ដូរស្ថានភាពជាក់ស្ដែងបច្ចុប្បន្ន ឬសកម្មភាពណាមួយ ដែលបង្កជាហានិភ័យនាំឲ្យមានអស្ថិភាព»។

សេចក្ដីថ្លែងការណ៍នោះ បានសង្កត់ធ្ងន់ថា៖ «យើងបន្តអំពាវនាវឲ្យមានការអត់ធ្មត់ និងចៀសវាងកុំមានសកម្មភាពណាមួយបន្ថែមទៀត ដែលបង្កជាហានិភ័យធ្វើឲ្យខូចដល់សន្តិភាព និងស្ថិរភាព»។

ពាក់ព័ន្ធនឹងការសេចក្ដីថ្លែងការណ៍នេះ ស្ថានទូតចិនប្រចាំនៅអង់គ្លេស បានបញ្ជាក់ថា ការលើកឡើងរបស់ក្រសួងការបរទេសនេះ គឺជា «ការបកស្រាយការពិតមិនអស់សេចក្ដី និងជាការបំភ្លៃការពិត»៕