នៅក្នុងសុន្ទរកថាប្រចាំឆ្នាំរបស់លោក អធិការបតីអាល្លឺម៉ង់ លោក Friedrich Merz បានលើកឡើងថា អឺរ៉ុបត្រូវតែអះអាងផលប្រយោជន៍របស់ខ្លួនឲ្យកាន់តែខ្លាំងក្លាបន្ថែមទៀត ដើម្បីធានាសន្តិភាព និងវិបុលភាព នៅឆ្នាំ២០២៦ ស្របពេលមានបញ្ហាប្រឈមជាច្រើន ដែលកើតចេញពីការឈ្លានពានរបស់រុស្ស៊ី គោលនយោបាយគាំពារនិយមជាសកល និងការប្រែប្រួលក្នុងទំនាក់ទំនងជាមួយសហរដ្ឋអាមេរិក។

ចាប់តាំងពីចូលកាន់តំណែង ក្នុងខែឧសភាមក លោក Merz បានជួយដឹកនាំកិច្ចប្រឹងប្រែងរបស់អឺរ៉ុប ក្នុងការគាំទ្រអ៊ុយក្រែនប្រឆាំងនឹងការឈ្លានពានរបស់រុស្ស៊ី។ ហើយទីក្រុងប៊ែរឡាំងក៏បានបង្កើនការចំណាយលើវិស័យការពារជាតិផងដែរ ចាប់តាំងពីឆ្នាំ២០២៣ ជាការប៉ុនប៉ង ដើម្បីបង្ហាញថា ខ្លួនបានត្រៀមរួចជាស្រេចហើយ ដើម្បីទទួលខុសត្រូវបន្ថែមទៀត។

នៅក្នុងសុន្ទរកថាឆ្នាំថ្មីរបស់លោក លោក Merz មិនបានបន្ថយដៃនោះឡើយ ដោយបាននិយាយថា ភ្លើងសង្រ្គាម «ដ៏គួរឲ្យភ័យខ្លាច» ដែលកំពុងឆេះយ៉ាងសន្ធៅសន្ធៅនៅមាត់ទ្វារផ្ទះរបស់អឺរ៉ុប បានគំរាមកំហែងដោយផ្ទាល់ដល់សេរីភាព និងសន្តិសុខរបស់ទ្វីបនេះ។ លោក Merz បានសង្កត់ធ្ងន់ថា៖ «យើងកំពុងមើលឃើញកាន់តែច្បាស់ឡើងៗថា ការឈ្លានពានរបស់រុស្ស៊ី គឺ និងជាផ្នែកមួយនៃផែនការដែលមានគោលដៅប្រឆាំងនឹងអឺរ៉ុបទាំងមូល»។ លោកបានឲ្យដឹងទៀតថា អាល្លឺម៉ង់ជួបប្រទះនឹងអំពើវិឆ្ឆេទកម្ម ចារកម្ម និងការវាយប្រហារតាមប្រព័ន្ធអ៊ីនធឺណិតជារៀងរាល់ថ្ងៃ។

មេដឹកនាំអាល្លឺម៉ង់រូបនេះ បានបន្ថែមថា បញ្ហាប្រឈមមួយបន្ថែមទៀត គឺចេញមកពីគោលនយោបាយគាំពារនិយម នៅក្នុងសេដ្ឋកិច្ចសកល ហើយថាការពឹងផ្អែករបស់អឺរ៉ុបលើវត្ថុធាតុដើម ដែលបាននាំចូលកំពុងត្រូវបានប្រើប្រាស់កាន់តែខ្លាំងឡើងជាឥទ្ធិពលនយោបាយប្រឆាំងនឹងតំបន់នេះ។

ដោយប្រឹងប្រែងយ៉ាងខ្លាំង ដើម្បីស្តារសេដ្ឋកិច្ចដែលផ្តោតលើការនាំចេញរបស់ខ្លួន អាល្លឺម៉ង់កំពុងព្យាយាមកាត់បន្ថយការពឹងផ្អែកលើចិន ខណៈដែលប្រទេសនេះ ក៏កំពុងប្រឈមនឹងភាពតានតឹងពាណិជ្ជកម្មសកល និងឥទ្ធិពលនៃគោលនយោបាយពន្ធគយពាណិជ្ជកម្មរបស់ប្រធានាធិបតីអាមេរិក លោក Donald Trump៕