អាជ្ញាធរប៉េរូ បានប្រាប់ឲ្យដឹងថា មនុស្សម្នាក់បានបាត់បង់ជីវិត និងយ៉ាងហោចណាស់ ៤០នាក់ផ្សេងទៀតបានរងរបួស នៅក្នុងហេតុការណ៍រថភ្លើង ២គ្រឿងបុកគ្នា នៅលើខ្សែផ្លូវរត់នៅទីក្រុង Machu Picchu។

យោងតាមការិយាល័យរបស់រដ្ឋអាជ្ញា នៅទីក្រុង Cusco ដែលនៅកៀកបំផុតនឹងទីតាំងបុរាណ Inca បានឲ្យដឹងថា ជនរងគ្រោះដែលបាត់បង់ជីវិត គឺជាអ្នកចាត់ចែងប្រតិបត្តិការរថភ្លើង ១គ្រឿងនៃរថភ្លើងដែលបុកគ្នានេះ។ ក្រុមមន្ត្រីបានប្រាប់ថា កិច្ចប្រឹងប្រែងកំពុងដំណើរការ ដើម្បីកំណត់អត្តសញ្ញាណអ្នកដំណើររងរបួស ដែលភាគច្រើនជាភ្ញៀវបរទេស ។

ភាគច្រើនត្រូវបានគេរាយការណ៍ថា បានរងរបួសធ្ងន់ធ្ងរ។ វីដេអូដែលផ្ញើដោយអ្នកដំណើរទៅកាន់ទូរទស្សន៍ RPP បង្ហាញឲ្យខើញអ្នករងរបួសដេកនៅក្បែរផ្លូវរថភ្លើង ដោយមានក្បាលរថភ្លើងខូចចំនួន ២គ្រឿងចតស្ងៀមក្បែរនោះ។

រថយន្តសង្គ្រោះបន្ទាន់ជាង ១០គ្រឿង និងបុគ្គលិកពេទ្យ ត្រូវបានបញ្ជូនទៅកាន់កន្លែងកើតហេតុ ដែលមានទីតាំងស្ថិតក្នុងតំបន់ដាច់ស្រយាល Andean។ ភ្លាមៗនេះ មូលហេតុដែលនាំឲ្យមានការបុកគ្នានេះ មិនទាន់ត្រូវបានដឹងនៅឡើយទេ។

ភ្នាក់ងារផ្លូវដែក Ferrocarril Transandino បានឲ្យដឹងថា រថភ្លើងដែលដំណើរការដោយក្រុមហ៊ុន PeruRail បានបុកជាមួយរថភ្លើងគ្រឿងទៀតដែលជាកម្មសិទ្ធិរបស់ក្រុមហ៊ុន Inca Rail នៅថ្ងៃត្រង់ នៅលើផ្នែកផ្លូវតែមួយ ដែលតភ្ជាប់ទីក្រុង Ollantaytambo ជាមួយទីក្រុង Machu Picchu៕