អាជ្ញាធរបាននិយាយថា កងកម្លាំងសន្តិសុខទួរគី បានឃុំខ្លួនជនសង្ស័យចំនួន២៩នាក់ កាលពីថ្ងៃពុធ ក្នុងអំឡុងពេលប្រតិបត្តិការដែលត្រូវបានសម្របសម្រួលកំណត់គោលដៅលើបុគ្គលដែលត្រូវបានចោទប្រកាន់ពីបទផ្សព្វផ្សាយឃោសនាឲ្យក្រុមរដ្ឋអ៊ីស្លាម (IS) នៅលើបណ្តាញផ្សព្វផ្សាយសង្គម។

ប្រធានការិយាល័យរដ្ឋអាជ្ញាសាធារណៈទីក្រុងអ៊ីស្តង់ប៊ុលបាននិយាយថា ប្រតិបត្តិការនេះត្រូវបានអនុវត្តដោយសាខាប្រឆាំងភេរវកម្មនៃអង្គភាពនគរបាលទីក្រុងអ៊ីស្តង់ប៊ុល ជាផ្នែកមួយនៃការស៊ើបអង្កេតលើសមាជិកនិងសកម្មភាពរបស់ក្រុមរដ្ឋអ៊ីស្លាមដែលសង្ស័យ។ ការស៊ើបអង្កេតនេះ ត្រូវបានធ្វើឡើងបន្ទាប់ពីការវាយប្រហារដ៏បង្ហូរឈាមមួយនៅភាគពាយ័ព្យនៃខេត្ត Yalova ដែលបានបណ្តាលឱ្យមន្ត្រីនគរបាលបីនាក់ និងសមាជិករដ្ឋអ៊ីស្លាមដែលសង្ស័យ៦នាក់ស្លាប់។

អាជ្ញាធរបាននិយាយថា ជនសង្ស័យចំនួន ២៨ នាក់ត្រូវបានកំណត់អត្តសញ្ញាណពីបទផ្សព្វផ្សាយឃោសនាឲ្យក្រុមរដ្ឋអ៊ីស្លាមតាមបណ្តាញអ៊ីនធឺណិត ខណៈម្នាក់ទៀតត្រូវបានគេរកឃើញថាមានជាប់ពាក់ព័ន្ធយ៉ាងសកម្មនៅក្នុងអង្គការនេះ។ សេចក្តីថ្លែងការណ៍បាននិយាយថា ការឆ្មក់បង្ក្រាបក្នុងពេលដំណាលគ្នាត្រូវបានធ្វើឡើងនៅទីតាំងដាច់ដោយឡែកពីគ្នាចំនួន២៩កន្លែង នៅទូទាំងទីក្រុង ក្នុងអំឡុងពេលនោះនគរបាលបានរឹបអូសសម្ភារៈឌីជីថល និងឯកសារជាច្រើន។

ប្រទេសទួរគីបានបង្កើនប្រតិបត្តិការប្រឆាំងក្រុមរដ្ឋអ៊ីស្លាម ក្នុងរយៈពេលប៉ុន្មានសប្តាហ៍ថ្មីៗនេះ ខណៈដែលការវាយតម្លៃស៊ើបការណ៍សម្ងាត់បានព្រមានអំពីហានិភ័យសន្តិសុខកើនឡើងក្នុងអំឡុងពេលថ្ងៃឈប់សម្រាកឆ្នាំថ្មី។