សមាជិកសភាស្ត្រីជិត ៦០នាក់ នៅក្នុងប្រទេសជប៉ុន ក្នុងនោះរួមមានទាំងលោកស្រីនាយករដ្ឋមន្ត្រី Sanae Takaichi បានដាក់ញត្តិទាមទារឲ្យមានបង្គន់អនាម័យបន្ថែមទៀត នៅក្នុងអគាររដ្ឋសភា ដើម្បីឲ្យសមនឹងចំនួនតំណាងស្ត្រីកើនឡើង។

ទោះបីជាចំនួនអ្នកនយោបាយស្ត្រី បានកើនឡើងនៅក្នុងការបោះឆ្នោតចុងក្រោយ និងបើទោះបីជាលោកស្រី Takaichi ក្លាយជានាយករដ្ឋមន្ត្រីស្ត្រីដំបូងគេកាលពីខែតុលាក៏ដោយ ក៏នយោបាយជប៉ុននៅតែគ្របដណ្ដប់យ៉ាងច្រើនដោយក្រុមបុរស។

បញ្ហានេះត្រូវបានឆ្លុះបញ្ចាំងដោយការមានបន្ទប់ទឹកតែមួយដែលមានបន្ទប់តូចចំនួន ២ សម្រាប់ស្ត្រី ៧៣នាក់របស់សភាជាន់ទាបប្រើប្រាស់ នៅជិតសាលប្រជុំពេញអង្គដ៏សំខាន់របស់សភាជាតិ Diet នៅកណ្តាលទីក្រុងតូក្យូ។

លោកស្រី Yasuko Komiyama មកពីគណបក្សប្រជាធិបតេយ្យធម្មនុញ្ញ (Constitutional Democratic Party) ដែលជាគណបក្សប្រឆាំង បាននិយាយថា៖ «មុនសម័យប្រជុំពេញអង្គចាប់ផ្តើម សមាជិកសភាស្ត្រីជាច្រើន ត្រូវតម្រង់ជួរយ៉ាងវែង នៅមុខបន្ទប់ទឹក»។

លោកស្រីបាននិយាយបែបនេះ បន្ទាប់ពីបានដាក់ញត្តិរួមគណបក្សដែលចុះហត្ថលេខាដោយស្ត្រីចំនួន ៥៨នាក់ ទៅកាន់លោក Yasukazu Hamada ប្រធានគណៈកម្មាធិការសភាជាន់ទាប ទទួលបន្ទុកច្បាប់ និងរដ្ឋបាល កាលពីដើមខែធ្នូ។

គួរបញ្ជាក់ថា អគាររដ្ឋសភា Diet ត្រូវបានបញ្ចប់ការសាងសង់នៅឆ្នាំ១៩៣៦ ពោលគឺជិតមួយទសវត្សរ៍ មុនពេលស្ត្រីត្រូវបានអនុញ្ញាតឲ្យបោះឆ្នោត នៅក្នុងខែធ្នូ ឆ្នាំ១៩៤៥ បន្ទាប់ពីជប៉ុនរងបរាជ័យនៅក្នុងសង្គ្រាមលោកលើកទី២។ យោងតាមសារព័ត៌មាន Yomiuri Shimbun បានឲ្យដឹងថា អគារសភាជាន់ទាបទាំងមូល មានបង្គន់អនាម័យបុរសចំនួន ១២ ដែលមានបន្ទប់តូច ៦៧ ហើយកន្លែងសម្រាប់ស្ត្រីមានចំនួន ៩ ដែលមានបន្ទប់តូចៗសរុប ២២៕