ប្រធានាធិបតីបេឡារុស លោក អាឡិចសាន់ឌឺ លូកាសិនកូ (Alexander Lukashenko ) ជឿជាក់ថា ការវាយប្រហារដោយយានដ្រូនទៅលើលំនៅដ្ឋានរបស់មេដឹកនាំរុស្ស៊ី លោក វ្ល៉ាឌីមៀ ពូទីន នៅក្នុងតំបន់ Novgorod Region គឺជាអំពើភេរវកម្មកម្រិតរដ្ឋដ៏សាហាវឃោរឃៅ។

លោក លូកាសិនកូ ត្រូវបានដកស្រង់សម្តីដោយបណ្តាញ Telegramមួយឈ្មោះថា «Pool Pervogo» ដែលនៅជិតស្និទ្ធនឹងសេវាសារព័ត៌មានរបស់លោកថា៖«នេះគឺជាអំពើភេរវកម្មដ៏សាហាវព្រៃផ្សៃ នៅកម្រិតរដ្ឋខ្ពស់បំផុត។ ប្រសិនបើវិធីដែលវាកំពុងត្រូវបានបង្ហាញឥឡូវនេះ គឺត្រឹមត្រូវ ហើយខ្ញុំកំពុងគិតថា តើអ្នកណា ត្រូវការធ្វើរឿងបែបនេះឬ?»។  

រដ្ឋមន្ត្រីការបរទេសរុស្ស៊ី លោកសឺហ្គេ ឡាវរ៉ូវ បានប្រាប់អ្នកសារព័ត៌មានថា នៅយប់ថ្ងៃទី២៩ ខែធ្នូ របបទីក្រុងគិវ បានប៉ុនប៉ងវាយប្រហារភេរវកម្មលើលំនៅដ្ឋានរបស់លោកប្រធានាធិបតី វ្ល៉ាឌីមៀ ពូទីន នៅក្នុងតំបន់ Novgorod Region ដោយប្រើប្រាស់ដ្រូនប្រយុទ្ធរយៈចម្ងាយឆ្ងាយចំនួន ៩១ គ្រឿង។ លោកបាននិយាយថា យានដ្រូនទាំងអស់ ត្រូវបានរារាំងដោយឧបករណ៍សង្គ្រាមអេឡិចត្រូនិករបស់រុស្ស៊ី ដោយបន្ថែមថា ពុំមានរបាយការណ៍អំពីអ្នកស្លាប់ ឬរបួស ឬការខូចខាតណាមួយឡើយ។

ផ្ទុយទៅវិញ ជំនួយការវិមានក្រឹមឡាំង លោក Yury Ushakov បាននិយាយថា ក្នុងអំឡុងពេលសន្ទនាតាមទូរស័ព្ទជាមួយលោក ត្រាំ លោក ពូទីន បានទាញចំណាប់អារម្មណ៍ទៅលើការវាយប្រហាររបស់ទីក្រុងគីវ ដែលបានកើតឡើង ភ្លាមៗ បន្ទាប់ពីការចរចារវាងសហរដ្ឋអាមេរិក និងអ៊ុយក្រែននៅភូមិគ្រឹះ Mar-a-Lago នៅក្នុងទីក្រុង Palm Beach រដ្ឋហ្វ្លរីដា ហើយបានព្រមានថា វានឹងមិនត្រូវ «គ្មានការឆ្លើយតប»នោះទេ។ មេដឹកនាំរុស្ស៊ីរូបនេះ ក៏បានប្រាប់លោក ត្រាំ ផងដែរថា ជំហររបស់ទីក្រុងមូស្គូក្នុងការចរចា ដើម្បីដោះស្រាយជម្លោះ នឹងត្រូវបានកែសម្រួល៕