ទីក្រុងប៉េកាំង នៅថ្ងៃពុធ (ទី៣១ ខែធ្នូ ឆ្នាំ២០២៥) នេះ បានថ្កោលទោសបណ្តាប្រទេស រួមមានទាំងជប៉ុន និងអូស្ត្រាលីផងដែរ ដែលបានរិះគន់ ចំពោះសមយុទ្ធយោធារបស់ចិន នៅក្នុងដែនទឹក ជុំវិញកោះតៃវ៉ាន់ ដោយចាត់ទុកថា ការលើកឡើងនោះ គឺ «គ្មានការទទួលខុសត្រូវ»។

ប្រទេសចិនបានបាញ់មីស៊ីល និងដាក់ពង្រាយយន្តហោះចម្បាំងរាប់សិបគ្រឿង នាវាកងទ័ពជើងទឹក និងនាវាការពារឆ្នេរសមុទ្រ ជុំវិញកោះនេះ កាលពីថ្ងៃទី២៩ និងទី៣០ ខែធ្នូ ក្នុងអំឡុងពេលធ្វើសមយុទ្ធបាញ់គ្រាប់ពិត។

មានការរិះគន់បន្ទតាមគ្នាជាអន្តរជាតិបន្តបន្ទាប់ ចំពោះសមយុទ្ធរបស់ចិន ក្នុងនោះរួមមានពីជប៉ុន អូស្ត្រាលី និងបណ្តាប្រទេសនៅអឺរ៉ុប។

ជប៉ុនបានលើកឡើងនៅថ្ងៃទី៣១ ខែធ្នូនេះថា សមយុទ្ធរបស់ចិន «ធ្វើឲ្យភាពតានតឹងខ្លាំងឡើងៗ» នៅទូទាំងច្រកសមុទ្រតៃវ៉ាន់ ខណៈដែលក្រសួងការបរទេសអូស្ត្រាលី បានថ្កោលទោសសមយុទ្ធយោធានេះថា «នាំឲ្យមានអស្ថិរភាព»។ ចំណែកសហភាពអឺរ៉ុប កាលពីថ្ងៃទី៣០ ខែធ្នូ បានបញ្ជាក់ថា សកម្មភាពយោធា «បង្កគ្រោះថ្នាក់ដល់សន្តិភាព និងស្ថិរភាពអន្តរជាតិ»។

ទីក្រុងប៉េកាំង នៅថ្ងៃទី៣១ ខែធ្នូនេះ បានប្រតិកម្មតបធ្ងន់ៗទៅការអត្ថាធិប្បាយទាំងនោះ។ អ្នកនាំពាក្យក្រសួងការបរទេសចិន លោក Lin Jian បានប្រាប់អ្នកសារព័ត៌មាននៅក្នុងសន្និសីទសារព័ត៌មានមួយថា៖ «ប្រទេស និងស្ថាប័នទាំងនេះ កំពុងធ្វើជាមិនដឹងមិនឮ ចំពោះកងកម្លាំងបំបែកខ្លួន នៅកោះតៃវ៉ាន់ ដែលព្យាយាមសម្រេចបានឯករាជ្យ តាមរយៈមធ្យោបាយយោធា»។

លោកបានបន្ថែមថា៖ «យ៉ាងណាក៏ដោយ ប្រទេសទាំងនោះ កំពុងធ្វើការរិះគន់ ដោយមិនទទួលខុសត្រូវ ចំពោះវិធានការចាំបាច់ និងយុត្តិធម៌របស់ប្រទេសចិន ដើម្បីការពារអធិបតេយ្យភាពជាតិ និងបូរណភាពដែនដីរបស់ខ្លួន ដោយពួកគេបានបំភ្លៃការពិត និងធ្វើឲ្យយល់ច្រលំ រវាងភាពខុស និងត្រូវ ដែលជាការបង្កប់កិច្ចកលទាំងស្រុង»៕