អ្នកស្រុករស់នៅតំបន់ Zaporizhzhia បានប្រឆាំងការជំរុញរបស់មេដឹកនាំរុស្ស៊ី ដើម្បីរឹបអូសយកទីក្រុងរបស់ពួកគេទាំងស្រុង ដោយពួកគេនិយាយថា ពួកគេទុកចិត្តលើកងកម្លាំងប្រដាប់អាវុធអ៊ុយក្រែន ដើម្បីការពារពួកគេ ។

 លោកយាយ Nataliia វ័យ ៧៥ឆ្នាំ និយាយប្រាប់ទីផ្នាក់ងារព័ត៌មានរ៉យទ័រថា ជាការពិតណាស់ថា វាគឺជារឿងគួរឲ្យខ្លាចកាលដែលទាហានរុស្ស៊ីនៅចម្ងាយប៉ុន្មានគ.មម៉ែត្រប៉ុណ្ណោះពីទីក្រុង Zaporizhzhia ។ តើនឹងមានអ្វីកើតឡើងចំពោះទីក្រុងរបស់ពួកយើង វាគួរឲ្យខ្លាចខ្លាំងណាស់ ប៉ុន្តែអ្វីទៅដែលពួកយើងអាចធ្វើបាននោះ? 

 កាលពីថ្ងៃចន្ទ ប្រធានាធិបតីរុស្ស៊ីលោក Vladimir Putin បាននិយាយប្រាប់កងទ័ពឲ្យជំរុញយុទ្ធនាការដណ្តើមយកទាំងស្រុងតំបន់ Zaporizhzhia ស្ថិតនៅភាគខាងត្បូងអ៊ុយក្រែន ក្រោយមេបញ្ជាការរុស្ស៊ី និយាយថា កងកម្លាំងទីក្រុងមូស្គូ នៅចម្ងាយ ១៥គ.មប៉ុណ្ណោះ ពីទីក្រុងធំបំផុតរបស់ខ្លួន ។

 លោក Putin បានធ្វើសេចក្តីអត្ថាធិប្បាយបែបនេះ នៅថ្ងៃក្រោយថ្លែងទៅកាន់ប្រធានាធិបតីសហរដ្ឋអាមេរិកលោក Donald Trump ពីទស្សនីយភាពសម្រាប់កិច្ចព្រមព្រៀងសន្តិភាព នៅអ៊ុយក្រែន ហើយនិងថ្លែងក្នុងជំនួបផ្សាយតាមកញ្ចក់ទូរទស្សន៍នៅឯវិមានក្រឹមឡាំងជាមួយក្រុមមេបញ្ជាការយោធាជាន់ខ្ពស់ និងរដ្ឋមន្រ្តីការពារជាតិរុស្ស៊ីលោក Andrei Belousov ។

 តំបន់ Zaporizhzhia ដែលទីក្រុងមូស្គូគ្រប់គ្រងបានប្រហែល ៧៥ភាគរយរួចទៅហើយនោះ ស្ថិតនៅក្នុងចំណោមខេត្តចំនួន ៤របស់អ៊ុយក្រែនដែលលោក Putin ប្រកាសថាជាផ្នែកមួយរបស់រុស្ស៊ី កាលពីឆ្នាំ ២០២២ គឺជាចំណាត់ការមួយត្រូវបានបរិហារដោយទីក្រុងគីវ និងបណ្តាប្រទេសលោកខាងលិច ថាជាការដណ្តើមទឹកដីដោយខុសច្បាប់ ៕